Вик1егь хьайи къуьр

Хьана кьван, хьанач кьван са япар яргъи,
тум куьруь къуьр.  Гатуз адан хам рагъу жедай,
хъуьт1уьзни лацу.
Хъуьт1уьн мекьи жив вай вахтунда, ада куьлер к1аник
ацукьна гьамиша гьайифардай, вучиз лагьайт1а,
адаз вичизни, севрез хьиз, гьахьна са магъарадиз,
гатфаралди ахвар ийиз к1андай.
Амма адаз Аллагь бубади ахьтин аламат ганвачир.
Гьавиляй ам гьар са ван хьайила зурзаз, кьуд пата
вил къэкъуьриз жедай. Адаз живедлайни къекъвез  са акьвадар
к1ани тушир, вучиз лагьайт1а, гелер себеб яз, вич ничхирдин
тапацра гьатда лугьуз къурху тир...
Са юкъуз, недайдахъ къекъвезвай гишин жанавурдиз валарикай
къуьрен ни къведа. Ам ч1угуна ниэдалди къуьрен патав
мукъаятдаказ фида.  Валарин к1аник живеда чин хьанавай къуьр,
жанавур вичин кьилив къвезвайди чир хьайила, хкадарна алай
чкадилай катда. Жанавур адахъ галтугда. Къуьре гьикьвадар
хкадарнар, ялар, алцурар авунайт1ани, жанавур адахъай мад
гахлатзамачир. Къуьрни яваш-яваш зайиф жез хьайила, жанавурди
ам хкъазвай. Адаз чир хьана, жанавурдин гъиляй мад вич ахкъат
тийидайди.
Кич1е хьанвай къуьре вичин эхирдин декьикьаяр гьисабзавай.
-Хьайиди жеда,гьик1 хьайит1ани рекьидайди я,-лагьана ада.
-Вуч тафават ава,нин къармахра эхирдин нафас къачун.
 Ада йигиндаказ са к1ам галай патахъ чук1урна. Камайт1уз
ялзавайла, са фура авай к1унт1 хьанвай живедин винел
хкадарна. Адаз чизвай аник сев ксанвайди. Гьавиляй,
адан винел элягьай ч1авуз, амай туп хьтин авайдалай мадни
виниз хкадар хьана са патал эхлягьайла,тадидаказ къахрагъна
кхатна.
Кьулухъай ялзавай жанавурни гьа ин к1унт1ал элягьна.
Жанавур элягьай ч1авуз, кунт1ани, садлагьана виниз хьана, пис
гьараяр ийиз эгеч1на. Жанавурдиз пис хьана.
Ам кьве чкадал пай хьайи хьиз, сад садахъ галтугна,
къуьрни рик1елай фена, гурц1улди хьиз ц1угъ ийиз катна.
Севре, лагьайт1а, вичин винел са дагъдин пад аватай хьиз,
ахварайни гьеле ават тавуна, муькуь патахъ ялна.
Къуьр, вичин фикир кьилиз акъатайла шад хьана,
хтана вичин чкадал ахцукьна. Мад ин хъуьт1уьз адак кядай
са ничхирни хьанач.
Бязи вахтара, кич1е хьайила, къуьрекайни аслан жеда.