Куьз герек я, низ - женг чилин, я диндин?
Инсанд уьмуьр гекъиг жеда цlвекlрендив.
Дад такунвай ашкъид ифей темендин -
Саламатдиз кlвализ хъша, аскерар.
Гьакимариз язух къведач бендейрин,
Себебкарар куьн туш абрун дердерин.
Кьин хьурай квез вилин накъвар дидейрин,
Саламатдиз кlвализ хъша, аскерар.
Гатфар къвезва, къе - пака гуьг акъалтда,
Хутун ттарци гъенеллай, цуьк ахъайда.
Тамир куьне дидейрин вил дакlардал,
Саламатдиз кlвализ хъша, аскерар.
Бубайрин рикl къванцикай я лугьуда,
Чlалахъ жемир, абру къеняй чlугвада.
Буба жеда квекай, ахпа аквада...
Саламатдиз кlвализ хъша, аскерар.
Вилив хуьзва куьн рушарин пагьари.
Пlинид вилер рекье тамир вахарин.
Элкъуьн тавуй къуй мурадар агьариз,
Саламатдиз кlвализ хъша, аскерар.
25.02.2024
***
© Copyright: Намик Фарзалиев, 2024
Свидетельство о публикации №124050403074
Свидетельство о публикации №124050403074
Рецензии