Ширин,ширин мани лугьуз,
Вав цуькверин к1унч1ар вугуз,
Ашкъидин ц1ай къизгъинариз,
К1анда гуьгьуьл гуьрчегариз.
Гьиссерин пак тир алемда,
К1анивилин тек къеледа,
Шуьткьвен тийир цуьквер жедай,
Са тар ава нуьк1вер къведай.
А тарцикай са багъ жеда,
Ам аквазмаз рагъ хъуьреда,
Ашкъидин гур гьиссерин сел,
Рик1е гьахьда бахтунин мел.
Гьич къакъудмир гьа и легьзе,
Пехилбурун фирай зегьле,
К1анивилин дуьнья я ким,
Чи рик1ериз багъишдай чим.
Ша кимел фин к1анивилин,
Им дуьз рехъ я къенивилин,
Къуй бахтуни цуьк акъудрай,
К1ани рик1ер чи агудрай.
26.04.2024.
К1анивилин ким
© Copyright: Нажмудин Шихнабиев 2, 2024
Свидетельство о публикации №124042605381
Свидетельство о публикации №124042605381
Рецензии