Маэстродин илгьам

Маина Абдулмуталибовадиз

Маэстро мад мукьва жезва роялдиз,
Гьихьтин аваз атанват1а хиялдиз…

Мукъаят яз, акъатзавай сесерал,
Назик туп1ар эцигзава мецерал.

Ц1ийи мани пайда жезва, якъин я,
Квекай ят1а, кьил акъудун четин я.

Яраб гьинай къвезват1а и авазар,
Надир илгьам айизвай бенд бугъазар?

Яраб ят1а къужахдикай дидедин,
Кьегьалрикай, белки, лезги дигедин!

Жегьил рик1ер агудзавай мехъерин,
Гимн ят1а ам тарихдикай лекьерин?

Чигерилай, цуькверилай багъларин,
Лекьерилай, синерилай дагъларин?

Живерилай Шалбуз-дагъдин кьилелай?
Гьиссерилай, алчуд жезвай рик1елай?

Атирдилай цуьклухдавай марвардин,
Симерилай туьнт чуьнгуьрдин, я тардин?..


Вири гьиссер авахьна а гьавайриз,
Чим гузвайбур чи рик1ерин давайриз.

Эх, Тамила, мукьвара чаз ван къведа,
Са шаирдин жавагьиррал чан къведа!





Эх, Тамила, мукьвара чаз ван къведа,
Са шаирдин жавагьиррал чан къведа!

***



Гьуьрметлу Маина Саидовна !
Гамарин магьир уст1арди  кваквар сад садав агудиз гьик1 гъилин сенятдин имаратар арадал гъизват1а , композитордини нотайрин квакварни агудиз музыкальный искусстводин имаратарни арадал гъизва.
Шаирди шиир кхьизва, композиторди адан хуруда руьгь твазва, шиирдал чан гъизва, лувар кутазва.
К1ани тир Маина Саидовна, куьне туьк1уьрзавай макьамри инсанрин рик1 шадарзава, гуьгьуьлар ачухарзава.
Инсанар патал руьгьдин рузи арадал гъизвай Квез за Аллагьдивай т1алабзава:
Сагълам, рик1из регьят уьмуьрдин йисар гун пара,
Халкьди мехъеррал, шад мярекайрал менфят къачудай нотайрин- макьамрин хара!