Тухвайт1ани лап деринриз гьуьлерин,
Алахъда зун сирнавиз цин винелди...
Мез лал хьана, аман квахьна гъилерин,
Батмиш хьайт1ан, гьарай тежез ванцелди,
Куьмекда заз ви ашкъидин гьиссери,
Абуру зун, пеш хьиз, винел ахкъудда.
Хутахда ви патав вили лифери,
Вуна залай ч1улав ажал алудда.
Чан хкида ви гъилери, нефесди,
Зи гъил вуна мад ви гъиляй ахъайдач.
Къакъатункай хуьда ашкъид гьевесди,
Мад садазни за куьмекдиз гьарайдач.
Икьван жуван макан к1ани инсандиз,
Хайи чилел сурни кьисмет жедачни?
Чилер амаз, йицера таз асантдиз,
Садаллагьдиз бенде т1ува къведачни?
Тухвайт1ани лап деринриз гьуьлерин
© Copyright: Тамила Хуршидова Салманова, 2024
Свидетельство о публикации №124040507981
Свидетельство о публикации №124040507981
Рецензии