Йифен хиял

Ксанва вири к1валерни, хуьрни. Гуя и дуьнья ксанва михьиз. Зунни зи хиялар текдаказ ама, чара авачиз. Дак1ардихъ; т1инкь-т1инкьзава марфади, вич къвезвайдакай чаз гузва хабар. Гуя марф лишан я, вацра ракъурай, эверзавай заз: экъеч1а гъенел. Заз адет хьанвай кар я - экъеч1ун къецел. Гьамиша хьиз, гьейран яз, зун килигна цавуз. Къе варз чуьнуьх хьанва закай булутрик ч1улав. И карди мадни дарихзава зун: гьак1ани яргъа ава зи экв, нур. Бес, варз, вун закай чуьнуьх жезва куьз? Ингье марфадин са еке ст1ал лумп1на аватна - чк1ана хъуьхъвел. Зуз атана чандиз, рик1из: белки, и ст1ал, вацра ракъурай хабар тир жеди... белки, зи к1ани вацра, аян яз закай, белки са лишан я, ракъурай заз, дяведавай хцикай...
Тахьайт1а вучиз ам, виридакай хкатна аватнат1а зал...Тахьайт1а вучиз ст1алдихъ галаз гьа са вахтунда рик1ни къудгунна?.. Зи рик1 незвай дарихвални санал алатна... Тахьайт1а вучиз, пиялади хьиз, а ст1алди зи кьилни элкъуьрна?
   Дяведин рангар... Гьеле ч1улав булутар алт1ушнава вацрал...
Са пад азад я, экв гузва вацра... Къвердавай мягькем жезва умуд: варз булутрикай азад жеда михьиз...
...Ихьтин хиялри марф зи рик1елай ракъурна, гьич жувазни хабар авачиз кьежирна михьиз. Эй цавар! Эй Сад-Аллагь, вал аманатзава за зи варз. Минет хьуй, экв зайифармир вацран!
Адан экв я гъизвайди зал чан.
Дидеяр гьазур я, рухвайрин рекье гуз чпин чанар.