Жамал Байрамалиеваз

      ШИИРРИН ДАФТАРАР
ЖАМАЛ БАЙРАМАЛИЕВ
Эй, зи шииррин хъипи дафтарар,
Гьикьван т1ар ийин сада-садан кьил,
Фад алатна чи умун гатфарар,
Нефинж пешерал аватзава гъил.

Рик1ин к1усар за гайибур я куьн,
Кутаз ц1арарик илгьамдин миже,
Са экв такуна кайибур я куьн,
Садаз бакара, татана виже.

Куьн хъуьч1е аваз къекъвена гзаф
Къалурун патал квез са экуь югъ,
Гатай рак1арихъ жагъанач инсаф,
Дегьлизрик хьана хуру ягъиз ц1угъ.

Ят1ани заз куь къадир туш ужуз,
Куьн я уьмуьрдин гатфарин ярар,
Амукьайла жув къе дердини куз
Аладарзава за хъипи чарар.

Эй, зи дафтарар, белки кьасухдай
Къелем илисна хьанат1а квез т1ар,
Са т1алабун захъ ама-язухдай
Куьне кьванни хуьх машгьур тахьай т1вар.


ЖАВАБ
***
Шаирвилин четин рекье хьана вун,
Адаз кьисмет каша-мекье хьана вун,
Шаирдин рик1 халкьдин рик1ин са пай я,
Начагъ тир чи ч1алан йикье хьана вун.

Авайди хьиз, гьуьмер, цифер булутар,
Начагъбурни чагъбур, руьгьдин набутар,
Бязи ц1арц1е чим ваъ,анжах са къай я -
Кхьидайбур - уст1арар, гьам кубутар.

Вахъ назик рик1, т1ува къведай чан хьана,
Хайи халкьдин сузадин ваз ван хьана,
Ви ч1аларин гьар са гаф ам са ц1ай я,
Гьавиляй вун пехилриз так1ан хьана.

Ч1алан т1ални ватандин дерт кужумна,
На т1ебиат шииратдиз таржумна,
Бед ният тир к1ан хьун ч1алар зай хьана,
Пехилбуру къаст рик1еваз гьужумна.

Шаирдин гаф ише физмач межлисда,
Къе базарган дуванбег я силисдин,
Дуьньядин чирк к1ват1завайбур виняй я,
Абур даим эрч1и гъил я иблисдин.

Халкьдин дердер гьиссзавайди дат1ана,
Малум кар я - амукьда чан кьурана,
Лап керчекдиз вун шаиррин патай я,
Бейадалат акваз ви рик1 ц1рана.

Бязибуруз кьведра кьвед -им вад хьана,
Кар авачир бязибуруз ад хьана, Ад авайди кар авайдаз мидяй я,
Савдагаррин а кимел вун сад хьана.

Гьахъ гафуни, уьлгуьчди хьиз, ат1уда,
Гьахъ гафунай рик1ин алем ац1уда.
Гьахъ тир гьар гаф пайгъамбардин дуьай я,
Михьи рик1и гьахъ яргъайни кьат1уда.

Къвез-хъфизва шумудни са гатфарар,
Ч1ал к1андайбур ашукь я ви гафарал,
Герек ч1авуз ви эвердиз гьай хьанач,
Ваъ!
Етим яз амукьдач ви дафтарар!