Сулейманан чуьнгуьр

За ахъайин: квез хьурай чир,
Дуьз лагьайт1а, чидач заз т1вар,
Сулейманан чуьнгуьрдин сир,
Вуж тирт1а ам авур уст1ар.

Ч1ехи кимел са гьяд йикъуз
К1ват1ал хьана хуьруьн махлукь.
Сада садаз муштулух гуз,
Атайдакай машгьур ашукь.

Акуна хьи Сулейманаз
Лугьузвайди вичин ч1алар.
Акъатнамаз сифте аваз.
Дегиш хьана адан гьалар.

Кимин кьулал фена жегьил,
Ада мани давамарна.
Вичи туьк1уьрай ч1ал – «Билбил»,
Эхирдалди тамамарна.

Сулейманан хвейи тереф,
Уьфтуьн хура гьатна ашукь,
Русвагь хьана, квахьна кенеф,
Кьил туьк1вейвал катна ашукь.

-За ваз чуьнгуьр илигда, хва,
Вун хьтинбур даях я чи.
Вав шаирдин бажарагъ гва. -
Уст1арди гаф гана вичин.

Вичин гъили авур туьк1уьр
Магьир алат саф уст1арди
Сулейманаз бахшна чуьнгуьр, -
Хвена вичин гаф уст1арди.

Сулейманан к1валин цлал
Чуьнгуьрдизни чка хьана.
К1валахарун вичин салал
Адан къени пака хьана.

Ашукь тир ам ч1алал, элдал,
Ам шаир тир, тушир ашукь.
Ам гими тир ч1алан селдал,
Гьар са гаф арифдиз талукь.

Шикилрай мугьманрин бязи
Шаир чуьнгуьр гваз аквада.
Авун патал мугьман рази,
Чуьнгуьр мет1ел кьаз аквада.

Къапиев т1вар алай жаван
Сифте таржум тир шаирдин.
Савадлу хва яхулжуван
Литратур рекье хийирдин.

Хва хьиз тир ам Сулейманаз,
Лап вичин веледривди гуьр.
Багьа тир гьа алат жуваз -
Эфендидиз бахшшна чуьнгуьр.

Йисар фена... Ятар фена...
Гьамзатован юбилей тир.
Эфендид паб Натальяди
Бахшна Расулаз гьа чуьнгуьр.

Музейдиз чуьнгуьр вахкудай,
Расулазни мажал хьанач.
Вахканайт1а, гьамни кудай,
Вири кана. Чуьнгуьр канач.

Ц1аяри, куз тарар, тамар,
Ч1улаварда къуьлер ник1е.
Амма Сулейманан ч1алар
Лезги халкьди хуьзва рик1е.


***

Тамила Хуршидова

Сулейманан чуьнгуьр

За ахъайин, квез хьурай чир,
Дуьз лагьайт1а, чидач заз т1вар,
Сулейманан чуьнгуьрдин сир,
Вуж тирт1а ам авур уст1ар.

Ч1ехи кимел са гьяд юкъуз
К1ват1ал хьана хуьруьн махлукь.
Сада садаз муштулух гуз,
Къвезва лугьуз машгьур ашукь.

 Са арадлай халкьдин вилик
Экъеч1на сад пайиз дамах,
Кьакьан буйдин, хъвер квай сивик,
Гъиле чуьнгуьр, кьилел бап1ах.

Рахана хуш чуьнгуьрдин сим,
Ашукьдини хкажна сес.
Манидивди ац1урна ким,
Кутуна халкьарик гьевес.

Сулейманни алай инал
Манидиз ашукьдин яб гуз.
Килигайт1а, лугьузвай ч1ал
Туьк1уьрайд тир вичи гатуз.

Фена кимел, хкажна гъил,
Ашукь ада акъвазарна.
Вичин хурун гаф тир «Билбил»
Манидалди давамарна.

Чуьнуьхгумбат1 успат хьайи,
Уьфтуьн хура гьатна ашукь.
Келеф квахьна, русвагь хьайи,
Кьил туьк1вейвал катна ашукь.

Чуьнгуьрчиди и кар акур
Сулейманаз кьуна хиве:
- Хуш аваздин ц1ийи чуьнгуьр,
Шаир, твада за ви гъиле.

Бажарагъдин лап эвелдай
Ам шаир тир, тушир ашукь.
Ам гими тир ч1алан селдал,
Гьар са гаф арифдиз талукь.

Шикилрай майданрал бязи
Шаир чуьнгуьр гваз аквада.
Авун патал мугьман рази,
Алат мет1еллаз аквада.

Йисар фена худ уьмуьрдин,
Яшар хьана и алатдин.
Сулейманан а чуьнгуьрдиз
Кьисмет хьана аламатдин.

Са хейлин вахт ядигар яз,
Ам к1вале аманат хьана.
Вич фидайла, Капиваз
Сулеймана савкьат гана.

Хва хьиз кьуна ада вичин,
Вириниз ам фидай галаз.
Эффендиди таржумачи
Шаир чирнай урус ч1алаз.

Бед фитнедин ц1ук акатна,
Капиеван кана уьмуьр.
Ада нубатдин савкьатна,
Вичин папаз туна чуьнгуьр.

Хвена к1вале багьа савкьат
Натальяди шумуд йисуз.
Къвез-къвез яшни хьана агат,
Тухудач кьван чуьнгуьр суруз,

Тазни жедач низ хьайит1ан
Сулейманан т1вар алайди.
Гана к1анда, гуз хьайит1ан
Гьадаз барабар авайдаз.

Йисар фена... ятар фена...
Гьамзатован юбилей тир.
Эфендид паб Натальяди
Расулаз бахшна гьа чуьнгуьр.

Музейдиз чуьнгуьр вахкудай,
Расулазни мажал хьанач.
Вахканайт1а, гьамни кудай,
Вири кана. Чуьнгуьр канач.

Ц1у чуьллерни  тарар, тамар,
 Гьатта къуьлер кузва ник1е.
 Сулейманан кудач ч1алар
Абур халкьди хуьзва рик1е.