Духтурриз

Чпин баркаллу пешедиз вафалу тир Буткъазмайрин хуьруьн ФАП-дин медперсоналдиз ва Мегьарамдхуьруьн райондин больницадин реанимацидин отделенидин заведиш Мисриханов Мусаиб Алипашаевичаз ва и отделенидин медперсоналдиз, зи бала хата-беладикай къутармишунай рик1ин сидкьидай зи дидевилин зурба чухсагъул лугьузва. Чпихъ чпин чандин ва хзанрин сагъвал, к1валера бахтарни берекатар хьун Аллагьдивай т1алабзава...


***

Чаз чидайвал, цаваралла Аллагьар,
Абурувай инсанри т1алабда –
Гьалал авун ахъайзавай гунагьар,
Чеб акъудун уьмуьрдин гьар азабдай.

Маса мурад жедач рик1е дидедин:
Балаяр хьун гьамиша сагъ-саламат,
Абур хуьнуьх ц1аярикай дяведин,
Балаяр хьун Сад-Аллагьдал аманат.

Кьилел завал атайла зи баладин,
Лув гана фад Лацу Лифер атана.
Я Аллагь, ваз ван хьана зи дуьадин,
На куьмекдиз малаикар ракъана.

Малаикар я духтурар Аллагьдин,
Аскерар я, сагъвал хуьзвай инсанрин.
Алахънавай чи уьмуьр к1ус хъсанриз,
Хура къвазна бед т1егъуьнрин гьелягьрин.

Чи духтурар, малаикар, мелекар,
Квез дидейрин патай къвезва алхишар!
Эхь, Аллагьди тунвайд я куь гъиле кар,
Т1егъуьнарни ийидайвал вердишар.

Баркалла квез экуь суваб зегьметдай,
Рик1ер зирек, чанар даим сагъ хьурай!
Регьимлу тир к1валахарин гьуьрметдай
Мурадрикай бегьер гъидай багъ хьурай!