Ахварарни терсининбур аквазвай

21.02.2024.

Заз ахварар терсининбур аквазвай:
Кузвай кьуд пад, кьуна ч1улав гумади.
Зун гъил кьуна са патахъди ч1угвазвай:
"Диде, ката!",- гьарайзавай балади.

Къуватсуз тир, ят1ани заз к1анзавай
Ц1ай хкадриз. Кузвай к1вачин к1анерни.
Ялав къати жез, къвердавай ванзавай,
Ценерикни ц1ай квай алай перемдин.

«А ялавда кана, зунни ц1ивин хьуй,
Гъил ахъая,- алахъна зун баладал. -
Зун руьхъ хьана, куьтягь хьана, секин хьуй,
Вун галачиз вучда за и дуьньядал!».

Ахпа, бала къужахдаваз, ахварай
Аватна зун, алхиш-дуьа мецеллаз.
"Зун чуькьвемир,», - аял завди рахана:
Ам ксана, зи хураваз  меселлай.



ЗАЛАН АХВАР

Куьтягьна хьиз жуван кIвалин кIвалахар,
Гьамиша хьиз, йиф кьулалай ханавай.
Ярх хьана зун, ийиз кIанз са вил ахвар,
Чилихъ ялиз танни юргъун хьанавай.

Къал-къиж авай кьиле – чIижре-куьнуьда,
Динж тазвачир зун чIижери хиялрин.
«Вуч авуна? Пака гьи кар ийида?
Вилик физвач… гуя гьар кар кимида…
Кьисмет гьикI хьуй акьалтзавай аялрин?..»

Ахварарни терсининбур аквазвай...
Гуя кузвай кьуд пад, кьунва гумади.
Зун гъил кьуна са патахъди чIугвазвай,
"Диде, ката!" – гьарайзавай балади.

Къуватсуз тир, ятIани заз кIанзавай
ЦIай хкадриз. Кузвай кIвачин кIенерни.
Ялав къати жез генани ванзавай,
Ценерикни цIай квай алай перемдин.

«Мусибатда кана зунни цIивин хьуй!
Гъил ахъая!» – алахъна зун баладал. –
Зун, руьхъ хьана, куьтягь хьана, секин хьуй,
Закай вучта амукьна и дуьнядал?»

Бала кьуна, хтайла кьил-кьилелди,
Катна къецел, хийир-дуьа мецеллаз.
"Зун чуькьвемир!" – рикI зурзурна аялди…
Уях хьана, зунни бала меселлаз.