Зи хважамжам

Низ чидай рагъ авай гуьлуьшан югъ икI садлагьана дегиш жедайди?
Чун, аялар, тарсар куьтягь хьана, школадай кIвализ рекье авай. Кефердихъай, рекьяй руг чи къаншардиз шиткизавай, кьезил гарни акъатна. Цаву, алем зурзурдай хьтин, къукърумарни авуна, гьа гар акъатай патай цавал пайда хьайи булутри рагъни чуьнуьхна.
ТIапIа-тIапI къачуна аватзавай ири стIалри, налугьуди, чиляй тIвеквенар акъудзавай. Марфадин стIалар алукьайла, чилел куьлуь кикIалар аватзавай хьиз жезвай. Аламат! Рагъни ава, ихьтин марфни... Жува жуваз мур-мурар ийиз, и тIебиатдин гуьрчегвиликай, марфадикай лезет хкудиз, стIуни гьерекат квачиз, хъфизвай зун кIвализ. Эхь, гьелбетда, кьежинни авунвай чун кьилелай кIвачелди. Сифте ириз акадна, ахпани куьлуьз ва къалиндиз къвазвай марфади  чун ей къайдада кьежирна. КIвалер чи мектебдивай са акьван яргъа тушир. Дуст рушар катиз, кIвализ гьерекатзавай, кьежин тавун паталди. Амма зак кIусни тади квачир.
Рагъни, гагь булутрик чуьнуьх жезвай, гагь мад малум хъжезвай...
Кьил цавуз хкажай заз акурди маса гуьрчегвал я тир!
Садлагьай сефер тир заз ихьтин гуьрчегвал аквазвайди, хважамжамдикай ванер хьанвайтIани. Заз акI авай, зун цавун къужахда гьатай хьиз, гуя са легьзеда маса алемдиз мугьман хьайи хьиз. Хважамжамдин рангар карандашар хьиз аквазвай, зи мектебдин чантада авай.
Акьван экуь тир хьи а рангар, акьван рикIиз тагьсирзавай хьи а гуьрчегвили...
Гьа икI хтана кIвализ ахгакьна зун. Дахди: «Тадиз кIвализ ахлад! Кьежей алухар дегишара! Диде гьеле хьрак ква», – лагьана.
ЯтIани зун, са акьван гьязавачиз, тади квачиз, кIвализ гьахьна. Кьежей парталар тадиз дегишна, за дакIардай жуван кихлигунар давамарна... Акъудна чантадай рангадин карандашар, албумда жуваз акур куьлуь марфадинни хважамжамдин шикил чIугуна.
 Чи хуьруьн кьилихъ пайда хьана, цавуз хъфей ирид рангунин хважамжам зи альбомда амукьна.
Амма зин хиялар сакIани секин жезвачир. И гуьрчег аламатдин шикил кIан хьана заз гафаралди кхьиз...
Чан Хважамжам, Хважамжам,
Вун чи кIвализ ша, Жамжам.
Къайгъу гуда дахди ваз,
Рагъ-фуъ гуда бахди ваз.
Чан Хважамжам, Хважамжам,
Вун дахдиз хьухь хва, Жамжам.
Вакай хьурай стха заз,
Стхаяр хьуй арха ваз.
Нурар чилел гадарда,
Чи эллер на шадарда.