Захъ сес амач эвердай кьван,
Вун атанач мад булахдал.
Аюх яни, тахьайт1а къван,
Наз гузва на низ дамахдал?!
Булахдин рехъ багьна кьуна,
Вахъ къекъвезва, дагъдин марал,
Вун зи рик1ин къене туна,
Зурзазва зун йифди къаял.
Инсаф ерли чидачни бес,
Жаваб тагуз ик1 жедани?
Ч1алар чизмач, кьурана мез,
Саил хьиз зун къекъведани!
Ша ачухин рик1ин сирер,
Икьван чун чаз к1ан хьайила,
Агудин чи кьведан рик1ер,
Чал кьведал са чан хьайила.
Муьгьуьббатди ахъагъуй цуьк,
Гатфарни гад гьатуй рик1е,
К1анибурни хьурай жуьт-жуьт,
Мехъеррин хьуй бахтлу рекье.
30.01.2024.
Рик1ин сирер
© Copyright: Нажмудин Шихнабиев 2, 2024
Свидетельство о публикации №124021805979
Свидетельство о публикации №124021805979
Рецензии