Лезги сес я шагь дагъларай акъатдай
Гьар са хьуьруьз гьар са кIвалив агакьдай
Экуьн шагьвар хуш бегьер хьиз авахьдай
Лезги сес я лезги чилин лезгивал
Хайи чIал хьиз хайи чилин синер я
Зар жуьредин атир галай гевгьер я
Йифиз йикъуз ачух жедай сегьер я
Лезги сес я лезги чилин лезгивал
Галукьайлай хьайи чIалан ширин ван
Муьгьуьбатдив ацIузва кьве жегьил чан
Намус михьи галай вичихъ михьи тан
Лезги сес я лезги чилин лезгивал
Са бязибур алахъда чIал хуьх лугьуз
Чидай касди гадардач ам са чIавуз
Хуш нагъмедал яб гайилай гьар йикъуз
Лезги сес я лезги чилин лезги вал
Ашукь Шемшир са дагъ хьана къарагъна
Къведай несил патал са гаф сурагъна
Чуьнгуьр кьуна мани лугьуз гьарагъна
Лезги сес я лезги чилин лезгивал
Лезги Сес
© Copyright: Шемшир Магамедов, 2024
Свидетельство о публикации №124021207029
Свидетельство о публикации №124021207029
Рецензии