***
АкI ава заз, зун я са ттар,
Пехъер алай хилерал…
Сефил мани лугьузвай тар –
Къадирсуздан гъилерал.
Бягьс тухузва тарцин тандихъ
Чайгъунрини тIурфанри.
Бягьс тухузва тарцин чандихъ
Марфари, цIайлапанри.
Гуя зун я гьачадин кIар,
Залан хилек кутунвай.
АкI ава заз, зал ала пар
Нагьакь кIулаз къачунвай.
АкI я хьи заз, зун я са гар,
Пешер нагьакь чукIуриз.
Зи рикIелай фенва зи тIвар,
Гафар жезмач кукIуриз
АвуртIани зи рикI саф-саф
Терс харари эркиндиз,
Анжах гуьлле я ви са гаф,
Чан къачудай секиндиз.
Пехъи жемир, чIулав тIурфан,
Къастар амай кьван чандихъ,
АкIажиз жеч вавай зи тан,
Дувул гала зи тандихъ.
АК1 АВА ЗАЗ, ЗУН Я СА ТТАР
© Copyright: Тамила Хуршидова Салманова, 2024
Свидетельство о публикации №124020808306
Свидетельство о публикации №124020808306
Рецензии