***
Къыйынлыкъны бетин кёргенде,
Жашаргъа кюрешди жюрегим.
Тёзюмлюгюм къалмай ёлгенде,
Жетерми Аллахха тилегим?
Сабырлыкъны къарла басханда,
Тёземе мен жалгъан жашаугъа.
Келирмисе сен жапсарыргъа,
Жокъда ышаныу дуниягъа?
Жауады къар ашыкъмай кёкден,
Тюйюлдю ол манга жапсарыу,
Эрип кетер болумсуз жерден,
Тохтатыргъа бизде къарыу.
Кече къарангыда кёк - чууакъ,
Жулдузланы элпекди саны.
Кёрюнселе да ала ууакъ,
Излейди аны кёкде жаным.
Жангы ай чыкъгъанды кечеде,
Этеме тилек, анга къарап.
Нени да керекме кечерге,
Къаллыкъ эсе жаныма жарап.
Къыйынлыкъны бетин кёргенде...
© Copyright: Исмаил Бейтуганов, 2024
Свидетельство о публикации №124011607470
Свидетельство о публикации №124011607470
Рецензии