Ётген кюнлерим, ашырдым сизни...

***
 
Ётген кюнлерим, ашырдым сизни,
Къайгъым, сагъышым, жарсыуум да бар.
Тар орамлары тау элибизни 
Кёрюнедиле алгъындан да тар...
 
Толу ышаныу - башыма палах:
Бир кёп адамны суннганма иги.
Этгенме алгъыш, болушсун Аллах,
Алай тилекни болмаз кереги.
 
Кёплени ашырдыкъ ахыр жолгъа,
Къабырла да болгъандыла толу!
Элде киши мал сюрмейди къолгъа,
Тепленмейди ары баргъан жолу!
 
Болдум мадарсыз баргъан жолумда,
Сатхычлыкъ да кёрдюм тенглеримден.
Сюйген адамларым да къойдула,
Турама къарап алагъа кенгден.
 
Мени хатам жетмеди алагъа,
Аямадым къолумдан келгенни.
Къалдым кесим, табына Аллахха,
Сынап жашагъанны эм ёлгенни.
 
Мен жан берир эдим деген тенгим,
Къайда къалдынг сынау болгъан кюнде?
Санга шуёх болдум, жюрек женгип,
Алай… жангызма мен ауур кюйде.
 
Излеп келирмисе мени артда?
Къол узатып, сыйларма, къыйналсанг,
Минерме мен къайтып Боракъ атха,
Насыпды деп, сен манга ышарсанг.
 
Сатхычлыкъгъа тёзалмайды жаным,
Жашайма мен, кечалмай ол атны.
Тёзалмайма, сени билип, танып…
Алай андан кёрдюнгмю азатны?