Кесиб Керим гл. 53б

Хехуьн зурба са тар авай гьаятда,
Адан к1аник ацукьдай ам галатна.

Чанта-чанта к1ват1 ийидай емишар,
Недайдахъ галаз ийидай дигишар.

Девлетрилайни тар адаз багьа тир:
Кесибвилин ам зурба са дава тир.

Каш такуна кьуразавай бедендиз,
Немумкин я регьятвал гун ц1екенди.

Адан дарман к1вале ава, синеллай-
Йифди адан т1вар Кериман мецелла.

Таран к1аник ацукьна гъам-хифетиз,
Тарахъ галаз дердерикай суьгьбетиз:

"Гъил къачу на етимдилай, азизди,
Ялав тунва зи хуруда иблисди.

Кьарай квахьна, дердерикай гуж хьана:
Заз са гуьзел чандилайни хуш хьана,-

Як1в, гъилевай, алтадзавай тандилай,-
Заз багьа я вун, зи кьейи чандилай",-

Лугьуз-лугьуз ат1узва тар етимди,
Ац1урзавай рик1 ивидив, регьимди.

Ат1ана тар, расна чунгур патахъ тир:
Ашкъидилай ажуз тир ам, ахмакь тир.

Тариф ийиз хьана гада алатдин,
Артухариз хъуьруьнар зарафатдин.

Юкъуз к1валах, йиф макьамдал элигна,
Гьинай, гьанай кьве гаф сацив гекъигна,

Яваш-яваш рик1ин дердер ачухиз,
Алатни гваз кимерал къвез, ацукьиз

Хьана Керим, мани лугьуз гьевесдив.
Лап вичиз кутугай хьтин я сесни.