Гуьмбетдин патав фикирар

Кьакьанзава минара хьиз тик гуьмбет,
Кьейилани кьазва тепе аскерри,
Къазанмишай чаз азадвал,чпиз гьуьрмет,
Шад хъверни  къе чинрал алай куьрпейрин.

Секин жедач женг ажалдин уьмуьрдив,
Инсан чилел, гъедни цава хкахьда.
Лепедилай лепе хьиз физ суьгьуьрдин,
Къатар-къатар жез  девирар авахьда.

Амма игит кучудналди накьвадик,
Я кар адан, я т1вар адан рекьидач.
Иви чилик, руьгь какахьда гьавадик,
Рик1ин ялав хайи чилел рекьидач.

Игит кьена, гъед куьк1уьнда гьуьндуьрда,
Гуьмбетдал нур къурдай вичи такабур.
Инсанар, куь хиял, фикир элкъуьрда,
Аквада квез куьн вири яз мукьвабур.

Рик1ел хкин къе гьар са кас невейри,
Хирер ц1ийи хъувун патал туш герек.
Къуй якъин чи лезги чилел дидейри
Шарвилияр хазмайди чир хьуй керчек.

  ******************

Асалдхуьруьн гъвеч1и жемят,
Ви веледри женг къурмишнай,
Душмандин гьа ч1уру т1ебят,
Хиял амаз, вич къирмишнай.

Къанни ругуд, къанни ругуд
Жегьил жаван хтаначир.
Лезги чилин хайи накьвар,
Чан гана, кьисмет хьаначир.

Бакудани къанни ругуд,
Телефнай хьи комиссарар.
Европадин уьлквейра геж,
Къекъвеначни бес асалар!

Уьтквем хваяр тир бубайрин,
Чанар гайи итимар.
Къе хуьрева квез вафалу.
Куь иви квай жегьилар.

       **********


Къанни ругуд, къанни ругуд...
К1авузардал к1аш хьиз залан
Къвезва рик1ел дердер залан.
Гатазва рик1,ифизва рик1
Ва мад ва мад гатазва рик1...

Анжах зайиф тахьуй гьич рик1,
Халкьдин чиниз килигда гьик1?!
Такабур хьухь Шалбуз дагъ хьиз,
Элдиз килиг, чилиз рагъ хьиз,
Шад, гумрагь хьухь ичин багъ хьиз,
Чин ачух хьуй цавун тагъ хьиз,
Къуй уьмуьр хьуй даим чагъ хьиз,
Виждан - михьи,лацу агъ хьиз.

Килиг винелд,эллер,садра,
Гуьмбет ава минара хьиз.
Лезгистандин п1ирер юкьва,
Сад артух я имарат хьиз.
Икрам ая, кьил агъузна,
П1ирел атай гьисаб кьуна.
Ислягь девран, азад ватан
Т1алаб ая кьасаб кьуна...

1987.