Пиянискадиз

Гьар ацукьай жугъун к1ане
Литрийралд цаз эрекь къене,
Кук1вар хьана бармакдин к1ук1,
Вун ичкидин хьанава лук1.

Шалвардин кек к1ама туна,
Хизан вири тама туна,
Хъуьртуьн к1ане духан кьуна,
Фу такваз, хъваз, яхун хьана.

К1вализ хквез са вацралай,
Эхир фида вун рагалай.
Гьа вич хьтин  галаз дустар,
Яргъал фида жал и сувар!?

Къведа эхир вун са йикъал,
Чанта жеда ви са къвалал,
Къекъвераг хьиз жеда хуьре,
Рюмка патал чан гуз вире.

Амукьич вахъ рик1 кудай кас,
Я ишехьич на кайи свас,
Акьул гьич мугьман тахьай кьил,
Вегь гардандиз жуван са ц1ил.

Хак акъатай жеда вун лам,
Гьар кткайда вегьез вагьрам.
Вахъ амайди са алчах сив я,
Ви аялри ваз гурд къив я.

Гана лугьуз на ч1урал чан,
Чик1идалди и ч1уру ван,
Вири хьиз хьухь вунни инсан,
Ви хизандиз жеда масан.

   **************

Эрекь-чехир хъвана к1анда,
Бес са себеб хьана к1анда.
Гьина гьикьван, вучиз ва мус?
Чирна хъухъ на, хвена намус.

Лугьумир, зун аслан я хьи,
Иливайт1а мад хъсан я хьи.
Шуьше туш вич, са тават я,
Фил ярхардай бес къуват я.

Галукьайла са-са вишер,
Ахквадач мад таза шишер,
Зегьримар хьай сергни чич1ек,
Вуч фад жеда мезни пелтек.

Ихтилатар жеда къалин,
Фикирарни гьуьл хьиз дерин,
Гьич чинал жеч хъенни серин,
Гьакьван я самопал ширин.

Сада-садаз лугьуз къастар,
Кьве-кьвед жеда рик1ин дустар.
Кьуьл ийидай къведа гьевес,
Акъатайла манидин сес.

Ажеб иер жеда межлис,
Тахьайт1а са кфир иблис.
Вири сад хьиз тур т1амада,
Сагърай межлисдин тамада.

11.05.1998.