Инсан ва азраил

Зулун цавай гъетре кьунвай
Эвич1зава гурар квачиз,
Силис тухуз инсандивай,
Азраил чанар къачудай.

-Эй инсан,вун и дуьньядиз
Гьарай-эвер гваз атанай.
Шел-хъуьруьнни какадарна,
Чабалмишиз атанай.
Лагь, къе виш йис хьайила ви,
Вуч авуна и девранда гуьзел на?
Яратмишна турди экуь дуьньядал,
Вуч я ам, лагь,
Худади гай уьмуьрда?!

-Шукур гъурай вичиз къвезмай несилри,
Гьа вич я лагь сад аллагьдиз эркинди.
Къабар алаз рекьидалди гъилерал,
К1валахна за жув ва хизан хуьн патал.
Чараданди чуьнуьхнач за, тарашнач,
Гъейри касдин т1вар кьунач за фитне гваз.
Дугъривилелд са кап фу т1уьн адет яз,
Яшамиш зун хьана экуь дуьньядал.
Яратмишна гьа жув хьтин веледар,
Аманат я тазвай за и цаварик.
Худади гуй регьим зи гьар баладиз,
Кутуй абур сад аллагьди луварик.

- Вун мискьи я, инсан,эгер мад зат1ни
Туначт1а на и дуьньядал виш йисуз.
Гьа вун хьтин пар дашмишиз недайбур
Туьретмишна, уьзягъ яни вунни къе?

-Къазмадикай к1вал авуна,
Ничхирдикай мал авуна.
Чилел бустан-сал авуна,
Дерени-дагъ чал авуна.

-Эй инсан,ваз уьмуьр гай халикьди вун
Гьайвандивай чара авун вуч хьанай?
Гъам-хажалат хьаначни ваз виш йисуз,
Рик1, ц1ай кьуна, каначни ви садрани?

-Гъам-хажалат тежер инсан жедани!
Залзалади са к1валер зи уьц1уьрнай.
Рик1 кабабна гатун цик1из ракъини,
Марфад ст1ал такъваз са йис хьаначни!

-Эй инсан, вун мад гьарай-эвер галаз
Хъфида къе дуьньядилай, т1ач жеда.
Вуч алцумин за терездал гъахъвилин,
Вахъ авайди анжах са ви дердер я.
Бес гьинва рик1, чарад патал на кайи,
Гьинва дерт -гъам кьезиларай чарадан?
Дарман эциг зи терездал на гайи,
Чара хьайи кайи-хъукъвайдаз, инсан.

-Заз вахт хьанач чарад патал рик1 кудай,
Ашукь тушир,кьезилиз дердер-гъамар,
Жерягь хьанач, кефсуздаз дарман гудай,
Жувахъ шехьиз, кьурана вилин накъвар...

    Ш А И Р :

Гьайиф,гьайиф...

Ваясуз уьмуьрдиз ик1 виш йис гун,
Вич гьамиша лап усал псис хьиз кун.
Квез я атун дуьньядиз и инсандин,
Вич тахьайла девирдиз и масанди?!

Гьайиф, гьайиф...

Гьайиф рекьиз чирагъар хьиз кай чанар,
Ц1ай кьур рик1ер, хкахьзавай гъетер хьиз.
Махлукьатдин вил галамай инсанар,
Рик1ерама гьа гъетерин эквер хьиз.

Гьайиф...

Саяд гьайиф, теснифай гуьзел баяд,
Етим Эмин, буба хьайи девиррин.
Куьн амачт1ан, манияр куь жеч баят,
Рик1ин гьарай хьайи шумуд несилрин.

Гьайиф...

Сулейманан чан къачузни тир гьайиф,
Большевик хьун эвер гай Ст1ал вац1уз.
Валентиназ вучиз дуьнья хьанай йиф,
Кард хьиз фейи гур дяведин къизгъин ц1уз?!

Гьайиф, гьайиф...

Инсан гьайиф рекьиз вичин т1вар тазвай,
Гьа т1варц1яй вич, вичин гьунар аквазвай.
Вири халкьдин хьанвай вич руьгь, арифдар,
Халкьдин мезни, ч1ал яракь яз аквазвай.

1988-йис.