Уггар т1ехдика!
Хьажа х1отта гергарчу, йоккхачу стаган,
Маьнге улле хиъна совг1аташ д1аделла,
Хьестир из, к1еда там беш цуьнан деган.
Ва, ма безаме йуь-кх, хьан стомма ч1аба,
Къоналлехь хьо т1еххаза йара ма бахар,
Алахь, хеттира ас, сий долу, хьоме Баба,
Маре а ца йодуш, х1унда даг1ийти дахар.
Суьйренга кхачарха, йехха шерийн йорта,
Шек йац хьаьнг-хьаьнга а, маре ца йахна,
Элира цуо йолуш, захалонаш дара шорта,
Къайлаха дуьйцур ду, муьлхуг ду бахьана.
Жима йолуш бара, дукха нах т1ехьийзаш,
Деший-детий д1аэца, йола бохуш доьхуш,
Корта бацара царах цхьаьннах а хьийзаш,
Сайн дагахь уггар т1ехдика к1ант лоьхуш.
Цхьана дийнахь шовдане хи дан со йахча,
Даго лехна к1ант вара мерза суна воьлуш,
Амма довзар-м дах ца делир, д1ахьаьжча,
Иза а хиллера, уггар т1ехдика йо1 лоьхуш.
Хьетахь дуьйна хьоза санна ахб1ешо даха,
Шо хьалха везар гира хьалха ас сатийсина,
Элара цуо, ца карийра йо1 хьоьлла дикаха,
Т1ехдиканиг лоьхуш цхьа а йоцуш виссина.
Ишттаниг жима йолуш дуьхьал а ца велира,
Дог доьлху, тхан тачанаш вовшах ца кхетта,
Безам ца хилча марелла дезаш ца лийлира,
Дуьненах догц1ена чекхйолуш нийса а хета! (С) 08.11.23.
Свидетельство о публикации №123110906949