Кьведра жен...

Инсандиз кьведра жен дуьнядал атун,
Кьведра гун кьисметар чилин винел жез.
Мажал жен уьмуьрдин сир - суьгьуьр кьатlуз,
Шанс жен садра мад цаварлай хквез.

Яргъи хьуй лугьузвач, вуч я гьам хьурай,
Нин пелел вуч ала, гьа уьмуьр бес я.
Амма пайна гьа сад кьве сефер гурай -
Аллагьдив гьуьжетиз жеч хьи, эбес я.

Гьа чlавуз зазни са бенде хьиз кьисмет
Жедай, мергьематдик акатна Адан.
Кьведлагьай атунда чир жедай къимет
Хгузмай уьмуьрдин, гьакlни къетнендан.

Авур гъалатlбурун вири тахьайтlан,
Зазни дегишдайбур авайд я ана.
Авуна кlани тир, амма тахьайдан
Гуьгъуьна фидай зун, килиг тавуна.

Месела, дидедин патав жедай зун
Жедай кьван гзафдиз, пара чlавариз.
Гъенел циг ятlани ифенвай гатун,
Физ тирни туна ам, зун сирнавариз?

Низ чидай кьузуьвал, рикlелай финар?
Тахьайтlа кхьидай за гьар сефердиз
Гъвечlи яз бадеди ахъаяй махар,
Амукьрай лагьана, рикlин дефтердиз.

Ахпа мектеб юкьан...азиз муаллимар...
Инжиклу авуна абур за пара.
Регьят кьиле гьатдай гудай илимар,
Де секин ацlукьиз жедачир кьарай...

Фарагъат жедай зун кьведлагьай сефер,
Юлдашрихъ галазни гьич кикlидачир.
Патав ацlукьнавай рушан кьаз кифер
Ялна чан кудачир, ам иширдачир.

Мягьледин женжелрик акатна асла,
Къуншидин кицlелни кац гьалдардачир.
Кицl кацал элкъвейдал, чун хьахьна салаз
Тахьай ракъун цуькер кьатlна, катдачир...

Дустунихъ галазни зун кикlидачир,
Ада зи ктабдин чин падна лугьуз.
Такабур квахьда луз, регъуь жедачир,
Кlанзавай рушаз заз вун кlанда лугьуз.

Уьмуьрдин инистут кlелунралди туш,
Уьмуьр вич гьа вири чаз тарс гуз фида.
Вахтар акъуддайни инистутриз буш -
Уьмуьр чириз жедай мектеб хьанайтlа?!
07.07.2023