Дагъдин хуьре мич1и йифер
Гьик1 акъудин дуьнья такваз!
Яргъарава нурлу эквер,
Рик1 хъиткьинда абур акваз.
Гьаниз физ к1анз къудгъунда рик1,
Лув гуз к1анда, хьана са лиф,
Ацукь жедач,хьана гъарик1,
К1анид авач лугьуз "илиф".
Залан йифер, мич1и йифер
Хаталу я назик рик1из.
Цава ава сирлу гъетер,
Ишигъ тагуз фидай рекьиз.
Белки ава яр а хуьре,
Гьатна рик1е залан гъамар...
Барбат1дай за дагъни дере,
Аялди хьиз ийиз чамар.
Анжах ама зун зи к1вале,
Мич1и йифер акъуд тежез,
Хиялар я авайд рекье,
Ц1елхемар хьиз агуд тежез...
26.09.2023./03.33.
Мич1и йифер
© Copyright: Нажмудин Шихнабиев 2, 2023
Свидетельство о публикации №123092600601
Свидетельство о публикации №123092600601
Рецензии