Миллет къалай тас болады?

Бютеу миллет ана тилде сёлешсек,
Джер башында бизге джетген болмазед.
Сен да, мен да, ол да кюрешсек,
Къарачай тил тас болад деб къоркъмазек.

Джюз минг адам ана тилде сёлешсек,
Алан тилим турур эди джукъланмайын
Сен да, мен да, ол да кюрешсек
Башха миллет къарамазед сукъланмайын.

Бир талай эл ана тилде сёлешсе
Тил джашар деб,  юзюлмез умутубуз
Сен да, мен да, ол да кюрешсек
Миллетибиз къалыб кетмез унутулуб.

Джангыз бир эл ана тилде сёлешсе,
Къарачайлы ким болгъаны билинмез.
Сен да, мен да ол да кюрешсек,
Миллетими аллай кюню чырт келмез.

Бир юй къалса ана тилде сёлешген
Къарачайлы архив болуб, эшилир
Сен да, мен да, ол да кюрешсек,
Къарачай сёз минг джылдан да эштилир.

Ана тилде къуру экибиз сёлешсек,
Бири бирибизге нёгер болуб къалырбыз,
Сен да, мен да, ол бирси бла кюрешсек,
Алан тилге кюлден джилтин салырбыз.

Кесим къалсам ана тилде сёлешген
Мен къагъытха ичги сёзню джазарма.
Мен сени бла, ол бирси бла кюрешмем,
Тилибизге терен уру къазарма.

Джюз джылладан археолог алимле,
Къаза келиб, мени урума тюбердиле,
"Алан миллет тюл кёреек залимле-
Тилин атыб, тас болгъанды"- дердиле.