Кьакьан тир дагъ, бегьердин багъ

КЬАКЬАН ТИР ДАГЪ, БЕГЬЕРДИН БАГЪ

Гьисабайла, алакьай кьван кIвалахар,
Лугьуз регьят, ийиз четин крар тир;
Михьи авур лезги чIалан булахар,
Къуьнерал кьур, ялай залан парар тир,
Кьакьан тир дагъ, бегьердин багъ, Седакъет!

Аламат тир, лезги жегьил руш хьана,
Гьам кIелуна, гьам кIвалахда зирек тир;
Лезги халкьдиз викIегь лекь тир, къуш хьана,
Вич чир хьайи, хайи халкьдиз герек тир,
Кьакьан тир дагъ, бегьердин багъ, Седакъет!

Шумудра за авунватIан тарифар,
ТIимил акваз, хъийизва мад багъишар.
Ви зигьиндал гьейран хьанва арифар,
Вири халкьдин патай авай алхишар,
Кьакьан тир дагъ, бегьердин багъ, Седакъет!

Зун са жизви хкаж хьанваз яшариз,
Ви гьунаррал дамахзавай шаир я;
Вун, неинки чешне я чи рушариз,
Эркекризни пара кIани магьир я,
Кьакьан тир дагъ, бегьердин багъ, Седакъет!

Ктабарни, шиирарни, манияр,
«Самур» газет, «Сувар» кIеретI кIвалахар,
Лезги халкьдин мел-мехъеррин синияр,
Шагьнабатдик какадрай кьван булахар,
Кьакьан тир дагъ, бегьердин багъ, Седакъет!

Сажидиназ, вах хьиз кIани инсан тир,
Бармак кьилел алукIуниз хас хьайи;
Лезги халкьдиз къуллугъзавай хъсан тир,
Мелек ятIан, лекьрез ухшар кас хьайи,
Кьакьан тир дагъ, бегьердин багъ, Седакъет!