Кьурагьжуван руш са иер,
Къужахдаваз экуьн сегьер,
Хъуьрез къвазна ч1улав вилер,
Акъатдан ам рик1яй мегер!
Кьакьан синел къугъвазва ам,
Цуькверикай туьк1уьриз гам.
Гьина ава вил алай чам,
Вучиз жезвач къаршидиз кам.
Ви гуьгьуьл кьаз зун я гьазур,
Ви майилар на заз къалур,
Хуьда артух за ви хатур,
На ашкъидин са чар ракъур.
Ажеб гьалтна зал и гуьзел,
Зи кьисметдин ч1ехи рекьел.
Кьин кьада за пак тир п1ирел,
Даим жеда вун зи рик1ел.
Акур къалай заз хьана хуш,
Кьурагь дагъда лув гузвай къуш.
Ихтилатар ийидач буш,
Вун зи яр я, дагъларин руш.
22.07.2023.
Кьурагьжуван руш
© Copyright: Нажмудин Шихнабиев 2, 2023
Свидетельство о публикации №123072206713
Свидетельство о публикации №123072206713
Рецензии