Махунин бинадаллаз туьк1уьрнава

Сажидин Саидгасанов

ЖАНАВУРНИ СИКI

(Махунин бинедаллаз)

Чуьл гегьенш я, ризкьи масан,
Яшамиш жез четин хьанвай.
Кьуьд алукьай чIавуз йисан,
Живедикай батин хьанвай.

Гьа и чIавуз мичIи тама,
СикI къекъвезвай ем тачагъиз.
Гьикьван туртIан япар кьама?
Ял ядай вахт-дем тачагъиз.

Тамун кьиле, тарар кьери,
СикIрез аскIан кIвал акуна.
Кьуьзуь хьана, кьена къари,
Дишегьлийрин къал акуна.

Секин хьанвай тамун кьуд пад,
Дуьньяни кваз мичIи хьанва.
СикIрен сивяй, гишин яз яд
Физвай, руфун ичIи хьана.

СикI илифна  ичIи кIвализ,
ХъуьтIуьн раж нез, къариди тур.
Гаф авачир гъвечIи кIвализ,
Къах авай – са яцран ятур.

Инихъ-анихъ тамашна сикI,
КIвач галкIана, татаб хьана.
КилигайтIа, аватна рикI,
Вилик квайди – ктаб хьана.

Ктабдин са-са ахъайна чин,
Къекъвей цIарар-гафар тир кьван.
Гьич кьил акъат тийир вичин,
Гьар жуьредин гьарфар тир кьван.

Са кар-кеспи авачирдаз,
Машгъул жедай сенят хьана.
Дуьньядихъ вил галачирдаз,
Недай ризкьи кьегьят хьана.

СикIрез йифиз ксай чIавуз,
Акун тавур ахвар хьанач.
Туп хьиз хкаж хьана цавуз,
Аватай сикI ярхар хьана.

Гагь рак гатаз, гагьни дакIар,
Жанавурдик къал акатна.
СикIре чуьнуьх авур якIар.
Акур чIавуз квал акатна.

-Салам алейк!
-Алек салам! –
Вагьшияр кьвед таниш хьана.
-Вуч затI ятIа течир калам,
И бахт  вал гьикI багъиш хьана?

-Гьикьван уьмуьр гьалда тама?
Камун кьииз завалдик квай?
Къе захъ хьанва зи кIвал-чума,
Фекьи я зун кавалдик квай.

Тарсар гуда, Кьуран кIелда,-
СикI рахана цавай-цавай-
Месэлаяр регьят гьялда,
ГьакI акъвазиз жезвач завай!

Жанавур – кьил рехи авам,
СикIрен тапан чIалахъ хьана,
Жанавурди лугьуда – ам
Лап заз кIандай кIвалах хьана!

-Захъни ава шарагар вад,
КIелиз-кхьиз чир авуртIа?
Ришветарни гуда за мад,
Заз ви гардан кIир авуртIа.

-Ришвет-шеле кIандач артух,
Тарсар гуда Аллагь патал.
Уьмуьр давам ийиз кIанз тух,
Ялун хьана гунагь патал.

Чирвал къачуз кIандайбур мад
Гзаф ава, гъваш шарагар.
Яшамиш хьун паталди шад,
Устадар за хьурда пайгар! –

Хьайи чIавуз и шад хабар,
Шарагарни гваз жанавур;
Акур сикIре, вичин япар,
Тик хкажна, садран тавур.

Жанавур шад, мугъарадиз
Хъфин патал, рекье гьатна.
Къвез акурла кар арадиз,
Ашкъи сикIрен рикIе гьатна.

ИкI алатна вахт са кьадар,
СикIре са-сад шарагар нез.
Жанавурдин рикI хьана дар,
Ахтармишиз кIан жеда къвез.

КилигайтIа са шарагни
СикIрен патав такур ада
Акат ийиз мез саракни,
Жанавурди суал гуда:

-Гьинва кIелай зи шарагар?
-Ам зун тушир, зи вах тир сикI! –
Дегиш хьана чинин рангар,
Жанавурди гьарайна: -ГьикI!?

-Ам акуна кIанзаватIа,
И регъверик кутур ви кьил.
СикI ваз кьуна кIанзаватIа,
Зани гуда ваз эрчIи гъил. –

ИкI лагьана, кат хьана сикI,
Тамун юкьвал алай кIунтIал.
Жанавурдин аватна рикI,
Кими кьиле гьат хьана тIал.

КилигайтIа, сикIре кIунтIал,
Куткун храз, кIвалахзава.
Са-сад кутаз шуьмягъин тIвал,
Фад куьтягьиз алахъзава.

-Аквада за къе дуван,
И кьадардин таб жедани?
-Кими кьилел алцум жуван,
Биши тир кьве яб жедани?

Заз бубади куткун храз,
Чирна, шумуд йисар хьанва.
-Зазни чирдан куткун храз?
На гайибур тарсар хьанва.

-Чирда, гьелбет, ацукь ина,
За чирда ваз куткун храз.
Ам куткунда амукь хьана,
Шез эгечIна, кьураз, цIараз.

-Эй чубаран, за куьн душман,
И куткунда кIевирнава.
Жанавурдихъ амач аман,
СикIре адан эхирнава.

Гуьнедайгъуз авадарна,
Жанавурни авуз куткун.
Чубанри шад хкадарна,
Жанавурдиз кьуна гатун.

Гьа инал, ахмакь жанавур,
СикIре алдатмишай саягъ;
Кьиса я за ахъай авур,
Куьн сад-садаз хьурай даях!