Болсун юйде берекет:
Хычын, гырджын, бёрек, эт,
Айран, сохта, джёрмеле
Аны ашарыкъ джёнгерле
Кюрешсинле, къыйнала,
Узалыргъа къыймагъа.
Шорпа, бышлакъбиширген
Нарзан суусаб - ичерге.
Этиб къабсанг мёрезе-
Ашхынынг ачха тёзер.
Къурумасын юйден акъ:
Сют, сютбашы, джау, бышлакъ.
Гардошунга тым боллукъ-
Сюзме, къакъ эт, не тузлукъ.
Кёгетледен бишир къаб-
Ол джарашыр сеннге таб.
Мюрзёуледен-как, джырна,
Къарнынг тоюб, сен джырла.
Ауруб къалсанг-билямукъ
Ичсенг, берир ол саулукъ.
Сен турурча иги халда-
Лапша, хурбай, ун халуа.
Иги хапарны айтхан-
Май аузуна табады,
Сёлеширге излемеген-
Къууут джуммакъ къабады.
Къууанчлада- уча, боза-
Миллетими ашы таза.
Тиздим билген хантымы-
Берекети халкъымы,
Джарашдырыб ашагъыз,
Къууанч бла джашагъыз!
Къарачай хантла
© Copyright: Мёлек Хубий, 2023
Свидетельство о публикации №123070306150
Свидетельство о публикации №123070306150
Рецензии