Муьшт1ерида авай хва

Муьшт1ерида авай хва,
Свас жагъуриз гьарай,хва.
Шагьвар къугъваз мекера,
Кьуьлерзава демера.

Гьинва хъсан рушар куьн,
Гъилив хвейи къушар куьн,
Вучиз жегьил аквазвач?
Ширин гафар рахазвач?

Вил хьаначт1ан мектебдихъ,
Агакьна хва метлебдихъ.
Дуьз гъавурда акьуна,
Къуллугъ маса къачуна,

Припев:
Жегьил рушар бул ава,
Хвадихъ девлет, пул ава.
Гьунарар туш гададин:
Гьунарар я бубадин.

Свас жагъуриз гарава,
Жегьил рушар харава.
Куьз рази руш жагъизвач?
Хвадин мурад туьк1уьзвач?

***

Вилериз ахвар,
Гъетериз цавар,
Гьуьлериз йатар,
Чилериз марфар,
Багъларни, тамар
Ракъиниз нурар
Кьадачни ажеб!

Инсандиз арха,
Дахадиз баха,
Иладриз руш, хва.
Вахазни стха,
Хуьруьз са кавха,
Уьздендиз чухва
Кьадачни ажеб!

Суалдиз жаваб,
Межлисдиз кабаб,
Хуьрекдиз хас къаб,
Эркекдаз дуьз паб,
Тапархъандиз таб,
Хаиндиз азаб,
Кьадачни ажеб!

Мехъердиз чамар,
Фитнедал дапIар,
Ламраз кьве пут пар,
Гагьрудиз лувар,
Гъезелдиз кьве цIар,
Къелемдизни чар
Кьадачни ажеб!


***
Лацу перем алай зи яр,
Гьикьван ч1угван за ви дидар?
Камар къачуз куьлуьз -куьлуьз,
Мус къведа вун чи к1вализ?

 Припев:
Зи лацу лиф, зи лацу лиф,
Заз мугьман хьухь вун илиф,
Вун галачиз жезва зайиф,
Чан лацу лиф чан лацу лиф.

"Перизада"мани галаз,
Кьве енге вах кьве къалаллаз
Салам гана регъуьз -милиз.
Мус къведа яр вун чи к1вализ?!

Лацу перем алай зи яр,
Гьикьван ч1угван за ви дидар?
Камар къачуз куьлуьз -куьлуьз,
Мус къведа яр вун чи к1вализ?

 Припев:
Зи лацу лиф, зи лацу лиф,
Заз мугьман хьухь, ша вун илиф,
Вун галачиз жезва зайиф,
Чан лацу лиф чан лацу лиф.

"Перизада"мани галаз,
Кьве енге вах кьве къалаллаз
Салам гана регъуьз -милиз.
Мус къведа яр вун чи к1вализ?!