Намус даим вине кьуна кIеледлай,
Заз гунагьар чидайди туш бинедлай.
Ам пай я заз атанвай зи дидедлай.
Зи лап чIехи гунагьдин тIвар вун я, вун.
Гьич гунагь туш, вун зи руьгьдин гьалал я,
Гьелек хьанвай назик рикIин са тIал я,
Пак илгьамдин чешмедавай са чIал я,
Зи уьмуьрдин сачахдин тIвар вун я, вун.
Дамахзава ви гуьруьшдиз атунал,
Уьмуьрдин рехъ гъил гъилеваз атIунал,
Муьгьуьббатдин харари зун гатунал,
Зи лап чIехи дамахдин тIвар вун я, вун.
Хуьруьн са руш на элкъуьрна мелекдиз,
Гьар макъамда лув гуз хьана куьмекдиз,
Садрани вун тадач текдиз, гьелекдиз,
Зи намусдин чахмахдин тIвар вун я, вун.
Вун себеб яз, акунач заз сефилвал,
Гьам я жед сир – давам хьун зи жегьилвал.
ТакIанбуру авурай чал пехилвал,
Зи пак таратI-пайдахдин тIвар вун я, вун.
Намус даим вине кьуна к1еледлай
© Copyright: Тамила Хуршидова Салманова, 2023
Свидетельство о публикации №123062804687
Свидетельство о публикации №123062804687
Рецензии