Экскурсия в традиц балкарскую саклю

Таулуну юйюне экскурсия

Билемисиз, сабийле, малкъарлыла
Эртте-эртте къалай жашагъандыла?
Къаллай юйле салгъандыла жашаргъа?
Ненча жюз жыл бола болур алагъа?

Да келигиз, жолоучула болайыкъ,
Ата-бабаларыбызны жокълайыкъ,
Атланайыкъ биз алагъа къонакъгъа,
Тюз баргъанча бир сейирлик жомакъгъа

Таулу ташсыз болмагъанды ёмюрде.
Хар бир ташны ариу салып бир бирге,
Таш устала ишлей эдиле журтла,
Ёмюрледе оюлмайын турлукъла.

Эшик ачып, босагъадан атласанг,
Салам берип, тёгерекге къарасанг,
Сен кёрлюксе эркин, таза отоуну
Ортасында сел жаннган сыгын отну.

Отлукъ ташла отну алып къуршоугъа,
Тютюню да ёрге ожакъ бла чыгъа,
Уллу къазан асылгъанды сынжыргъа -
Ма бу затха айтадыла - от жагъа.

Бу отоуну тёрюнде уа тыпыр таш.
Сыйлагъанды аны мында къарт эм жаш
Ёлюмсюздю учхунунг ол заманда -
Тыпыр ташынг сууумайын тургъанда.

Кийизле бла жасалып къабыргъала,
Чырдыны да тутуп орта багъана,
Жанлары бла орналып чигинжиле,
Тепсиде уа лёкъум, айран, жёрмеле.

Онг жанына, сол жанына эшикле:
Аппа, ынна, ата, ана, сабийле -
Толу юйюр жашайды мында алай,
Намыс берип, гитче уллуну сыйлай.

Жашлары уа юйленирге кёлленсе,
Келечиле иш тохтатып келселе,
Юй тамата этгенди анга оноу:
Къошхандыла юйге энтта бир отоу.

Ма, сабийле, таулуланы журтлары,
Былай эди кюн-кюнде турмушлары.
Ала - бизни ата-бабаларыбыз,
Аладыла бизни тамырларыбыз.