Хквезва рик1ел,
Аял ч1авун гел,
Хуш гьиссерин сел
Ч1уп ч1улав зилфер,
Дидедин кифер.
Киф авай зи дидедихъ
Дабан гатадай
Гьич садазни авачир
Дамах кутадай
Чешне гъанай чаз
Тефена яргъаз,
Бубадини кваз
Са агъзур сефер,
Дидедин кифер.
Хер хьана рик1ел,
Нагъв хьана вилел
к1ват1 хьана кьилел
хар къурай цифер
Дидедин кифер.
Туькьуьл накъварни
Квахьай ахварни,
Ч1улав йикъарни
мич1и тир йифер ,
Дидедин кифер.
Акур хажалат
Зайиф я тават,
Амукьнач къуват,
Гелкъведай магьфер
Дидедин кифер
Дидедин кифер
© Copyright: Тамила Хуршидова Салманова, 2023
Свидетельство о публикации №123060702657
Свидетельство о публикации №123060702657
Рецензии