***
Дуьзвилин гьисабунрал
Математика тек я.
Гзафардай ягъунар1
Ам ахъайдай гуьлег я.
Ша чун санал алахъин
Ягъунрин цlармуг2 чириз.
Чир хьайиди ам якъин,
Жеч садвайни алцуриз.
Сад ягъ садаз - жеда сад,
Кьведра садни - кьвед жеда.
Иридра вад къаницlувад,
Пудра кьуд цlикьвед жеда.
Кьудра пудни гьа гьакl я -
Им сирр хьиз тахьурай квез:
Дегишайла чкаяр
Жедайд туш сан дегиш жез.
Месела, вадрани пуд,
Пудрани вад - цlувад я.
Кьудра вадни вадра кьуд
Къад жезава - гьа сад я!
Къаницlуд я пудра цlуд,
Са цlудни - яхцlур жеда.
Ягъайтlа вадаз ругуд -
Ам пудкъадан зур жеда.
Бес цlудра цlуд шумуд я?
Адан тlварни виш я, виш.
Кьудкъад адаз кумукьда -
Вадра къад я вишен вич.
Пудра кlуьдни кьудра кlуьд
Сасадлай кlуьд фаркълу я.
Кlуьдал хтайтlа муьжуьд -
Цlерид я...куьн гьахлу я.
Чи уьмуьрдин виринра
Авайд я гьисабунар.
Эцигун - туькуьруьнра
Ам я кьилелай пунал.
Цава игрипланар,
Гьуьлера гимияр я.
Гьадав кьазва планар -
Вири гьадан гьунар я.
Бушлухрани ава ам,
Гъетерин рехъ гьисабиз.
Математикадин кам
Туш санани авачиз.
Гьавиляй чирна кlанда
Адан сифте гуьлегар.
Гьакl хьайтlа чна кьада
Какурвилиз гьелегар!..
...Сад ягъ пудаз - им пуд я,
Иридра пуд къаннисад.
Кьудра кьуд цlиругуд я,
Кlуьдра кlуьд - кьудкъаннисад...
1. гзафардай ягъунар - умножение
2. Ягъунрин цlармуг - таблица умножения
12.03.2023
Свидетельство о публикации №123040402725