Багъбан

Са багъбан тир кас хьаналда, югъ - йиф алахъна,
Зегьметдив багъ кутуналда яван, чиг чилел.
Атана багъ эрседиз, ам нур гуз алахьна,
Ийервилиз вичин кlандай килигдай вилер.

Акьван гуьрчек багъ хьаналда, адаз килигиз
Къведай къунши шегьеррайни, уьлкейрай рейят.
Акурбуруз акl жедай ам женнетдин багъ хьиз,
Гьакьван ана гьиссдай абуру вич секин, регьят.

Багъбанни хьи са къерехда акъвазна кьилди,
Гьяз къачуна акваз бегьер вичин амалдин.
Идалайни хъсан кефи адан акьулди
Кьатlун тийиз, чlалахъ хьана вичин камалдин.

Жагъаналда са кас - фитне твадай са шийир,
Лагьаналда: " Багъ кутуна харжидал жуван,
Вуганава на эллерив, вуч я ви хийир?
Гьакlан сагърай луз хьайитlан атанани ван?"

Багъбанди яб ганач сифте, кьилелайна ам,
Ганач адаз са гьемият, кьунач адан гаф.
Атадини къвазна вичин къастунал тlарам,
Туна ада икl багъбандин михьи рикlе хаф.

Къайи хьана багъбан эхир вичин кардикай,
Кихлигнач ам, аявалнач багъдиз мад ада.
Такабурди рехъ хганач са сагърай талгьай
Халкьдиз хъийиз, бес я лана за авур кьадар!

Югъ къандавай багъ цацари, валари кьуна,
Мили тушир гила и кьер акур тек садаз.
Де багъбандин япахъ гила фад - фад галукьна,
" Разивал"ни " сагърай " халкьдин...себзавай адаз.
22.01.2023