Руьгь кIубан яз, рикIер шад яз, хуррамдиз,
Икрам авун патал зурба инсандиз,
Къе и хуьруьз, Гомеран ХХ асирдин,
Атанва эл Сулейманан Ватандиз.
Агъа-СтIал – шииратдин Мекке* я,
Шаиррин кьадар хуьре еке я.
Ина гьатда хуш везиндин есирда,
Эхь, шиират – вич гуьзел са уьлкве я.
Барка рекье халкьдин кIвачин гел жеда.
ГъвечIи-чIехи агатайла, эл жеда,
Сулейманан чIалари хупI таъсирда:
Адан гьар са цIарцIикай са тел жеда.
ИчIи тахьун къанун я пак чкадин,
ЦIай къати я Сулейманан акадин.
Сулейманан багъдин гьар са шаирди
Экв гузва чун физвай рекьиз пакадин.
Са хуьр... Ина пуд шаирдин тIвар хьана:
Сажидинни Фейзудин – кьве устIар хьана
Сулейманан рехъ давамдай хийирдин.
Шииратдин Меккеда сувар хьана.
Шииратдин Мекке
© Copyright: Тамила Хуршидова Салманова, 2023
Свидетельство о публикации №123022409074
Свидетельство о публикации №123022409074
Рецензии