Кьудар

...***

 Гагь хъвер гъида на зи сивел,
Гагъ нагъв гъида зи кьве вилел.
Юрта жеда гар хьиз чилел,
 Гагь хар жеда къвадай кьилел.

***

 Зи дак1ардай рагъ аватна
На лугьуди вун я а рагъ
Зи рик1елай дагъ алатна,
Экуь хьана мич1и утагъ.

****
Алудиз валай ягъи кеменар,
Ракъурзава ваз яргъай теменар.
Вун тек тан тийиз,элкъвезвайбур вал,
Зи хиялар я юргъа семенар.

***

Шумуд йисуз къекъвена зун геле ви,
Гъил къачу, чар, тухванат1а зегьле ви.
Инсаф тийиз къакъуднат1ан вахт вавай,
Т1алабнач хьи гуз тежедай бахт вавай.

***
Ацукьнава зун рик1 ишез
Таб гувай хьиз жазадиз
Азандин ван япариз къвез
Ялварзава Худадиз :
Мумкинвал це бахтавар жез
Гьар са рушаз гададиз.
Аквадайвал хтулрин мез
Дидедизни бубадиз.

, * * *

Кьилди-кьилихъ амукьайла зун к1вале,
Са фикирди ван ийида зи кьиле:
Квез тир ихьтин эцигунар, и къеле? –
Кьве гъилелди кьуна ама зун келле.
Гьиниз фида хажалатрин  гваз шелле!
Ихьтин уьмуьрдикай физва зи зегьле.

***
Дердер авай вилерай зи накъвар чк1ана,
Ваз чар кхьиз к1ан хьайила гьарфар чк1ана.
Ваз са к1усни къайгъу хьанач зи сефилвилин,
Ц1айлапанар ягъиз къвана ,цавар чк1ана !,

***
Эхь, винелай инсан я,
Амма канва рик1.
Зун дердерин са чан я,
Сагъ амат1а гьик1?..

***
Я Аллагь, за гьарайин низ,
Лув гуз жезвач завай виниз,
Къурбанд хьуй зун ламу чилиз,
Чандиз икI дуван хьайи кас.



***

Чархачияр мехъерин,ша майдандал багърияр !
Халуяр, халаяр, стхаяр, эмеярни имияр.
Звер кутуна к1вачерик, хийир дуьа мецеллаз.
Ая кьуьлер, азизбур, лагь тостарни манияр !

Кьулухъ галай паруяр,
Играми тир халуяр.
Галачир югъ такурай
Куьн хтулан далуяр..,

***
К1анивилер пара хьурай эллериз,
Къенивилин тум чк1ириз  чуьллериз.
Шад майданрал сада садаз эвериз,
Руг акъудиз «Лезгинкадал» кьуьлериз ! 


***
Т1егъуьнарни хумаярни алудиз,
Капаш ягъиз гьар начагъдан далудиз.   
Гьарайдиз гьай хьанвай гьар са бендедин,   
Вичин пеше бегенмиш я халудиз.

Аманеви вун зи багъри халу я.
За гьиссзава вун хтулан далу я.
Са виш йисуз хьурай вун чи далудихъ.
Вун галачир югъ уьмуьрда кьалу я.

***
Вун тарсуниз хъуьрез-хъуьрез,
Къведай, ширин шекер тир мез,
Къалп крариз тушир шерик,
Гвай гьахъвилин мизан -терез.

Дафтар,къелем гана гъиле
Акьул туна на чи кьиле.
Ви зегьметдин нетижаяр
Аквазва къе гьар са хиле.

***
Лув гудайла ахц1укьариз,
Чукурайла алукьариз,
Гьахъ рахайла галукьариз,
Квай хесетар кумукьзава,
Зун вич жув яз амукьзава !

***
Пехъери хьиз чухвйт1ани,
Пехъи мецер рахайт1ани,
Фитнед селди тухвайт1ани
Зун са гъвелни дегиш жедач,
Маса жуьре вердиш жедач.

***