97 Гlорасиз долу адамаш

Вайна хууш ма-хиллара, муьлхха хlума а Делан пурбанций бен хила йиш йолуш а, йа лела йиш йолуш а дац-кх!..
   Дика болх хили-кх хьуна, «Алхьамдулиллахl (Дела, Хьуна хастам бу!)» алахьа! Вуо болх хилча а …изза алахьа! Хlунда аьлча, и ший а ма ду Делан пурбанца а, къинхетамца а хуьлуш!..
   …Царах цхьадолу хlуманаш хьо къинойх цlанвеш, хьуна кхин а боккха сингаттам баккха Шен йиш йоллушехь кlеззиг бекхам а бина хьо Дала кlелхьарвалийтар хила тарло, ткъа, кхидерш.., Шен пурбанца хилларг ахь муха тlелоцу а, ахь цу хьокъехь хlун олу а, хьан ойла муха хуьлу а хьожуш, дика хуург Ша воллушехь, хьо Цуо зиэр хила там бу.
   Хьо зиэн тарло: адамашца а, цамгаршца а, акхарошца а, кхийолчу садолчу хlуманашца а, иштта.., чохь са доцчу дахаран гlирсашца а…
   Цундела.., муьлххачу хьолехь а «АЛХЬАМДУЛИЛЛАХl! (Дела, Хьуна хастам бу!)» ала ахь! Муьлххачу хьолехь а, адамалла латтайе ахь хьайн сица а, дегlаца а!
   АЛХЬАМДУЛИЛЛАХl!
   Дала къинхетам бойла Шен Элчанан (Делера салам-маршалла хуьлда цунна) умматах!..
   Дала гечдойла вайна массарна а! Вай гlийла ду-кх.., мел «ас-со» бохурш а!
   Вай.., адамаш ма ду! Вешан догlмийн доладан а гlорасиз долу адамаш!..