Катда зун

   Бесханумаз
Зи уьмуьрда савухбур я ви гелер.
КIанзавайди са марф я кьил кьилеллай.
Михьи хъийиз муьгьуьббатдин пак чуьллер,
Са лишанни тан тийирвал чилеллай.

А чуллера хьанач вавай цуьквер цаз,
Къужахдалди багъишдайвал "кIанидаз",
Ахьтин шадвал вахъ галамаз хьанач заз,
 Акван, белки, на хкидай цIийидаз.

Жаваб тагуз ви гъуьнтIуьниз, туьгьметдиз,
Жедалди икI мавгьуматдин саврухдик,
Дурум гуда азиятдиз, зегьметдиз,
Вири уьмуьр жедалди ви басрухдик.

Рухваяр я акьуллу са итимар,
Эхна вири за балайрин гьуьрметдай.
ТIвар акьалтдач хьана лагьай етимар,
Гележегда кьил акъудрай къелетдай.

Зи малаик гьамиша зи къвалал хьуй,
Кьулухъ элкъуьн тийиз рекье гьатда зун.
ЦIемуьжуьд сан зегьметни ваз гьалал хьуй,
Вун авачир вилаятдиз катда зун.

Цел туш зи рикI агъу санал кIватIзавай,
Залан жезва къвердавай зи туькьуьл пар.
Хуьруьхъ, кIвалихъ вил галамаз катзавай,
Зи далудихъ дидед дуьа – чими гар…