Са хуьряй халкьдин пуд шаир!

Агъа-Ст1ал. Вичиз Максим Горкийди «ХХ- асирдин Гомер» т1вар гайи Дагъустандин Халкьдин шаир Ст1ал Сулейманан ватан. И хуьруьз, гьахъдаказ «шииратдин Мекка» лагьанай Расул Гьамзатова.
Икьван гагьда Агъа-Ст1ал Дагъустандин Халкьдин са шаирдин хуьр тирт1а, гила ам Халкьдин пуд шаирдин хуьр я. Чаз малум хьайивал и мукьвара Фейзудин Нагъиеваз (декабрдиз) ва Сажидин Саидгьасановаз (январдиз) Дагъустандин кьил Сергей Меликован Указралди Дагъустандин Халкьдин шаирар лагьай ч1ехи т1варар ганва.
Зи фикирдалди, Дагъустанда пуд кас Халкьдин шаирар акъатнавай маса хуьр мад авач. Ам шииратдин мекка тирди мад сеферда субут хъхьана.
Заз сифте нубатда чеб фадлай Халкьдин шаирар язвай, гила и кьакьан т1варар официалнидаказ тестикьарнавай кьве шаирдизни и ч1ехи т1варар мубарак ийиз к1анзава.
Кьвед лагьайди, заз жуван ватан – хайи хуьр, багъри халкь  хкажзавай, чпин баркаллу краралди чеб са хзандин, са тухумдин, са хуьруьнбур яз амукь тавуна, Дагъустандин вири халкьаринбуруз элкъвенвай рухвайриз БАРКАЛЛА лугьуз к1анзава! Къуй чпихъ халкьдин руьгь хкаждай мадни ялавлу эсерар кхьидай къуватар хьурай!

Ц1ай къати я Сулейманан акадин,
Ич1и тахьун къанун я пак чкадин.
Сажидинни Фейзудин чаз багьа я,
Рехъ гегьеншай шииратдин Меккадин.