Хуьре Мел

Чи дагъви халкьдиз асиррай асирриз атанвай,къенин йикъарани чпин  игьтияж амайди аквазвай,хейлин хъсан адетар ава. Рик1елай ракъур тавуна к1ани чи халкьдин хъсан адетрикай сад МЕЛ я. Мел хуьруьн чкада алай аямдани кьиле физвай мярекат я. Вилик вахтара техникадин такьатар авачирла гзаф тухудай ихьтин мярекатар. Агакь тийизвай хзанриз к1валер эцигдайла вири сад хьана керпичар ат1удай, къавуз руг гудай.Хуьруьн майишатдин к1валахрани мелерин рол ч1ехи тир. Тумар кутадайла,гвенар гуьдайла, мал къарадиз алаф гьасилдайла. Мехъерин гьазурвилер аквадайлани мукьва-кьилияр, къуни-къунши,хуьруьнвияр к1ват1 хьана агакь тийизвай хзанриз гьарда вичивай жедай  са куьмекдин гъил ийидай.Мелехъ вичин кьилин макьсад тир куьмек авунилай гъейри маса хъсан терефарни авай. Мел шадвилелди кьиле физвай мярекат тир.Ял ядай вахтунда мелен иштиракчийри манияр лугьудай,кьуьлер ийидай,хкетар махар,кьилел атай кьисаяр ахъайдай. Эвленмиш тахьанвай жегьилар патални важиблу тир. Абуруз садаз сад аквадай,рахадай мумкинвални жедай.
И йкъара чи Буткъазмайрин хуьруьн медениятдин к1вале лезги  халкьдин адетар рик1елай тефин патал  сегьнеламишнавай лезги мел къалурна . Кьиле медениятдин к1валин директор Айдун магомедов, художественный руководитель Усман Салманов, библиотекадин заведующая Гюлмира Мирзегаева, лезги ч1алан  ва литературадин  муалим Фатума Казумовна авай.
Нубатдин мел  руш гъуьлуьз  гузвай хзандикай тир. Руш мукьвара  тухузвай  к1вализ рушаз жигьизар гьазуриз куьмек гуз са к1ерет1 дишегьлияр к1ват1 жезва , гьарда вичелай алакьдай к1валах ийизва,куьмек гузва. Сар эвяна чхрадал гъалар ийизва ,гам хразва ва маса к1валахарни...
Чи лезги адетрин ,хайи ч1алан ч1ехи терефдар,  хуьре, районда  чи милли медениятдин дестегрикай сад тир хуьруьн мектебдин муалим Фатума Казумовнади  мелез килигиз к1ват1 хьанвайбуруз мярекатда къалурай адетрилай гъейри лезги халкьдин ц1ун к1валикай, милли хуьрекрикайни ихтилатар авуна. Лезгийриз гьар са вахтуниз,ч1авуниз, гьар мярекатриз кутугай т1уьнар авайди лагьана.  Чаз чи бадейрилай,дидейрилай агакьнавай рик1 алай хуьрекар гит1,т1ач,афарар,хинк1ар,исит1а,,хешил,сав  авайди  ва абур гьар са хуьрек гьик1 гьазурдат1а куьруь баянар гана. 
Мел кьиле тухуз куьмек гайибур хайи адетрал рик1 алай, ва а детар хуьре к1вале давамарзавай,раижзавай , тамашачийрин патай тарифдинни чухсагъулдин капариз лайих хьайи, ватанперес дишегьлийрин десте тир.
Мелен иштаракчияр ва тамашачияр Седагет Саидовади ва ашукь Айдуна чпин манийралди шадарна.
Зи рик1елни ихьтин ц1арар атана:

Халкь сад хьана санал авур мярекат,
Бес тушни ам хуьруьн,к1валин  берекат!
Дегь ч1аварай чал агакьай адетар
Пак ивирар, халкьдин руьгьдин девлетар !