Дидедин къужах

Школадай Камила уьгьуь ягъиз, тумавар акатна хтана. Бедендал ифинни алай.  Диде муьжуьд йисавай баладиз дарманар авунив эгеч1на. Кьве йикъалай Камиладиз са т1имил регьят хьана, ифинни алатна. Мет1ел кьил эцигнавай аялдиз дидеди, кифер храз, кьилелай кап алтадиз лугьузва:
– Ваз виридалай и дуьньяда вуч к1андай? Недай зат1ар, нинияр, иер пекер, гьайванар, къушар… – вуч к1андай?
– Заз, диде, чи к1валевайбур, чи хзан… Амма виридалайни гзаф вун, диде!
Гъвеч1и руш рахуриз, машгъулариз к1анзавай дидеди мад хабар кьазва  вичин биц1и рушавай.
– Ваз дидедин вуч к1анда? Я диде ма ам суал хьанач хьи! За вун гила пайдани паяриз? Заз вун михьиз вири к1анда.
– Я-е, чан руш, амма ваз виридалай гзаф вуч к1анда: зи гъилер к1андани, вилер к1андани, теменар к1андани?...
Мягьтел хьайи аял мет1елай кьил хкажна къарагъна, вилик акъвазна са декьикьада кис хьана. Ахпа виняй-гъуз дидедиз тамашна лагьана:
– Заз виридалай ви къужах к1анда, диде. – Багьна жагъай руш гьахьна дидедин къужахдиз, игис  хьана адан хурудив.
– Гьаан, диде, акунани, къужахда вири ава: гъилерни, теменарни, заз килигзавай вилерни…
Баладин жавабди диде мягьтеларна, адан  вилер ац1ана...
Эхь, дугъриданни дидедин чими,багъри къужахда гьар са нямет, гьар са гьисс,вири ава.
Мукьва инсанар багърияр къужахра гьатда. Аламатдин гьиссер ава къужахра. Дидедин къужах гьар са т1алдин дава-дарман я. Бубадин къужах – ана лап ч1ехи жавабдарвал, ч1ехи везифаяр хиве тунин кьуват-гуж ава. Стхадин къужах – ана вак лувар кутадай, ви далудихъ дагъ галай хьиз гьиссдай, намус-гъейратдин к1алубра твадай суьгьуьр ава. Вахан къужах – ана аламатдин к1анивални чимивални ва чандилай гъил къачудай гьиссни ава…
Къе гъвеч1и баладин жавабди зун ихьтин метлеблу фикиррал гъана: чун гьикьван ч1ехи ят1ани, чакай дидеяр хьанват1ани, чунни дидедин, багърийрин къужахрихъ ц1игел жезва.