Дидедин къужах

Валай чими, хъуьтуьл тирди валайни,
Мад са зат1ни ви  къаншарда эцигдай.
Акунач заз валай гегьенш къулайни,
Гьич са мугни, гьич са къулни гекъигдай.

За кужумдай хъуьтуьлвални чимивал,
На кьур ч1авуз зун хурудив игисна,
Гъил элкъуьриз гудайла заз к1анивал.
Ви верц1ивал гьа къужахда за гьисна,

Кьил хураллаз тик-такдин ван япара,
Дидед рик1ихъ яб акализ секиндиз,
Ислягь хьана фидай ширин ахварал,
Зун къужахда,гьахьай аниз эркиндиз.

Фена йисар акваз такваз акъатиз
Зи мет1елни ч1ехи хьана балаяр.
Къени к1анда заз дидедив агатиз
Куьз лагьайт1а адан къужах ала я.


"***
Валай чими, играмиди авани,
Зат1ни авач ви  къаншарда эцигдай.
Авач са муг ви къужахдив гекъигдай,
Вун зи уьмуьр, зи нефес я, гьавани,

На кьур ч1авуз зун, хурудив игисна,
За кужумдай ви хъуьтуьлвал, чимивал.
Гъил элкъуьриз гудайла заз к1анивал.
Ви верц1ивал гьа къужахда за гьисна.

Кьил хураллаз ви рик1ин ван япара,
Ви гафарихъ яб акализ секиндиз.
Ви къужахдиз гьахьдай даим эркиндиз,
Ислягь хьана фидай ширин ахварал…

Йисар фена, акваз такваз акъатиз…
Зи мет1елни ч1ехи хьана балаяр.
Виридалай дидед къужах ала я,
Къени к1анда заз дидедив агатиз.


Гьуьрметлу Маина Саидовна !
Гамарин магьир уст1арди  кваквар сад садав агудиз гьик1 гъилин сенятдин имаратар арадал гъизват1а , композитордини нотайрин квакварни агудиз музыкальный искусстводин имаратарни арадал гъизва.
Шаирди шиир кхьизва, композиторди адан хуруда руьгь твазва , шиирдал чан гъизва, лувар кутазва.
К1ани тир Маина Саидовна, куьне туьк1уьрзавай макьамри инсанрин рик1 шадарзава , гуьгьуьлар ачухарзава.
Инсанар патал руьгьдин рузи арадал гъизвай Квез за Аллагьдивай т1алабзава :
Сагълам , рик1из регьят уьмуьрдин йисар гун пара,
Халкьди мехъеррал, шад мярекайрал менфят къачудай нотайрин- макьамрин хара !