***

РИК|ЕЛ ХКИН

Ша, я Лачин, рик|ел хкин, чун мектебдиз фейи ч|авар,
«Тераш - тараш» лугьуз на зун, рик| ц|уруриз шурдай ч|авар.

Вуна вучиз гьар гъилера к|елдайла за лезги ч|алар,
Кьулухъай гьа манийвализ, ялиз жедай фите, ч|арар?

Виридаз хьиз вазни гудай чантадавай зурарикай,
Ичин, кьалун мадни хтун - дидеди хьра кьурурнавай.

Верц|идакьван вуч тир къвакъар, аялрив гьар юкъуз жедай,
Кицикарни, мад чумалар, къенфетар хьиз чна недай.

Рик|ел хкваш нисини фу, т|ям гилалди сиве амай,
Чи рушари нубатдалди гъиз виридаз пайиз авай.

Къаннивадав гвай вад ктаб - виридазни яз лап к|ани,
Хъсандаказ хуьдай абур, на лугьуди вилин нини.

Авачир са техникадин атрибутар суьгьуьрар квай,
Авайди чаз маллимар тир, илимарин куьлегар гвай!

Теране Керимова - Оруджева

Зарафатдин жаваб...

Чир хьанайтlа, Теране вах, на ам къе икl баябурда,
Ада вичи инжилрини ципицlрин ваз зур кьурурдай.

Дидед хьран кlарасарни гъидай ада мукьвал тамай,
Талгьурай луз къенин юкъуз на айибар, хьайи - кумай.

Ви чантани вичин къуьнел ялдай ада кlвале кьадар,
Рехъ хкверла, туьквендайни къачудай ваз шагалатар.

Рикlелламан а чlаварин " Ласточка"ни " Школьник"ар -
Винел срок кхьенвачир, кьас ягъайла хадай сарар?

Пряникни авай ана, алахъдай ам вири къачуз,
Чир хьанайтlа яцlу жеда куьлуь крар чlехи чlавуз.

Ниси вуч я, къаймахдин чlук гваз къведай ам тарсуниз, ваз,
Вичин гъилив гудай ваз ам, тадачир ви гъилер кьацlаз.

Тек са чlарар ял тавуниз заминвализ жедач завай,
Ам са сирр тир тек Лачиназ чидай, жегьил рикlе авай...
02.12.2022 г.