Яру ц1ук1 хьиз ифенвай п1узар
Эцигнай на зи п1узаррал, яр,
Къвана вал ахпа теменрин хар,
Зегьем рик1икай к1вахьна шагьвар.
Акахьна кьве вац1 хьиз гьиссерни,
Ахкунач чаз дуьнья, мехъерни.
Гьуьндуьрда экв гузвай гъетерни,
Пехил тир гатфарин цуькверни.
Алцумиз жедач бахтунин пар,
Циф алай, я рагъ авай йикъар.
Сада садан кужумиз гафар,
Хъуьт1уькай ийизва яр-гатфар.
Ашкъи, гьевес ргазвай чи рик1ер
Мукьва хьуй мадни, хъуьрез вилер.
Ифенвай п1узарри тур гелер,
Алат тавуй жедалди мехъер.
Ифирай п1узарар теменрин ц1ал,
Ргадайвал иви дамарра лал.
Акатуй рик1ик шадвилин къал,
Дуьнья хьуй са бахтлувилин к1вал.
Яру ц1ук1 хьиз ифенвай п1узар,
Рик1 хьуй хура адал гъидай зар.
Хурудин кьефес хьайит1а дар,
Рик1е ялавриз ачух рак1ар.
Ифенвай п1узар
© Copyright: Нажмудин Шихнабиев 2, 2022
Свидетельство о публикации №122120300341
Свидетельство о публикации №122120300341
Рецензии