***

Ви гаф ц1арц1ув  ат1ун, стха, яб це заз
Алакьдат1а, дурум це заз, таб це заз.
Зи кьат1унрин миже кьадай къаб це заз.
Чк1ай рик1е сабурдин ттвар цада за,
И дуьнядин тилисимар хада за.

Эйваз Гуьлалийрин

Гьикьван кlанда , я стха, за яб гуда,
Юн аватlа дурум гудай, таб гудай?
Акъвазайда чкадал, татаб гуда...
А сабурдин чешмедикай хъухъ вуна,
И дуьньядин тилисимар хух вуна.

Гьахъ нагьакь яз чизва гила, нагьакь - гьахъ,
Пакдиз напак, напакдизни лугьуз - пак.
Жуванди вун маса гуда са кlус фахъ,
Миллетдикай вучда ада хук туна?
И дуьньядин тилисимар хух вуна.

Цавай къвезва гзафдан ван, аваз къе,
Де тек - туькдан чанда ваз рикl акваз къе.
Жуван вацlни ягъи хьанва жуваз къе,
Тlуб юзуриз: " Фаракъатвал хуьх вуна..."
И дуьньядин тилисимар хух вуна.

Дидед чlалал рахаз къе чаз регъуь я,
Ата - буба чилел яд я, егъуь я.
Жуванди кlвач къазунда, фур эгъведа -
Яргъи уртlа са чекмедин кух вуна,
И дуьньядин тилисимар хух вуна.

Жуван гъалатl чаз чешне туш, гуьзгуь туш,
Ацlукьайди кабинетда - лезги туш...
Миллетдин дерт депутатдин кеспи туш,
Гьикl лугьудач ихьтинбуруз  " лухъ " вуна?
Ни акъатда - лап ягъана хух вуна...
И дуьньядин тилисимар хух вуна.
11.09.2022