Ингир ала кём-кёк кёкню сайында
Турна жыйын тизилишип барады,
Бата тургъан кюнню таякъларында
Аны жолу - къыбыла жанынады.
Жыйын башчы, къолгъа алып оноуну,
Турналаны эки ызгъа тизгенди.
Ол биледи арсарсыз солну, онгну,
Барына да гёзетчиди ол энди.
Барадыла, къанат къакъгъандан арып.
Къайдан? Къайры? Не жерледе къонарла?
Адамланы жарсыуларын да алып,
Жюк этип элтипми бара болурла?
Турналаны "къырыуларын" шургулу
Мухажирлик жырланыча эштеме.
Ашырама, къол булгъай, кёлюм толуп.
"Ахшы жолгъа! Сау жыйылыгъыз!"- дейме.
Турнала
© Copyright: Аминат Рахаева, 2022
Свидетельство о публикации №122112106300
Свидетельство о публикации №122112106300
Рецензии