За гъалат1риз ганач майдан,
Хьанат1ани зи чан гьалдан.
Ажуз хьана к1ирнач гардан,
За асланвал къене кьуна.
Зун туьгьметри гатай ч1авуз,
Кьил яц1ара гьатай ч1авуз,
Рик1 мецери ат1ай ч1авуз
За пашманвал гине кьуна.
Шерни буьгьтен харарив гуз,
Хажалатар гарарив гуз,
Пак фикирар чарарив гуз
За кирамвал хиве кьуна.
Зал нубатсуз атай гъилер,
Тахсир квачиз авур гелер,
Назик рик1ел хьайла хирер
За кьакьанвал сине кьуна.
Вегьей ч1авуз зал серинар,
Элкъуьрайла зал ц1ивинар,
Акъудайла заз ифинар
За хъсанвал бине кьуна
Пеше хьана ягъун ц1енкьер,
Дар ийиз заз шегьре рекьер,
Элкъуьрдайла ч1уру регъвер
За инсанвал вине кьуна.
За гъалат1риз ганач майдан
© Copyright: Тамила Хуршидова Салманова, 2022
Свидетельство о публикации №122110805871
Свидетельство о публикации №122110805871
Рецензии