Бахтаварни Шант1ур Чанту

*МуьтIуьгъ ксар къанундиз
Я  лугьуда лезгияр.
Чизвач, абур гьаядиз
Тирди михьи гуьзгуьяр.

ТIурунал нез, тумунал
Вил акъудиз "дустари"…
Гьатнавайбур чилада
Мидяйрин бед къастарин.

Харар вегьиз кIвачерик
Квахьуй лугьуз мягькемвал,
КичIер тваз кIанз кIарабда
Къакъудиз кIанз уьтквемвал.

Кьуд патахъай ягъийриз
Гайибур я басрухар.
Жезамай кьван эхзавай
Я сабурдин сандухар.

Акван гьа вахт атана –
Часпар цавуз акъатай,
Куьлег гарек тахьана,
ДапIар чилел аватай.

Зун душмандин дамардай
Иви хъвадай зили я,
Лугьумир хьи куьне заз
"Валлагь и руш дили я!"

Алазунрин иви квай
Зи дамарар хьелер я.
Хкатзавай чиликай
Гьар са къван са аскер я.

Бахтаварни ШантIур заз
Чир хьана чи тарихдай,
Гьеле къвезвач хатур заз,
Шадвал ийиз, тарифдай.

ЭверайтIа ватанди,
Зун эвердиз гьай жеда.
Гъиле кьуна хци тур,
Эркекрин зун тай жеда.

Хва-руш лугьун тавуна,
Сад жеда чун женгера,
РикIе хуьзва и гафар:
"Пуд сеферда эвера!"

Гьар са руш са аслан я,
(Туш чун диши псияр).
Кьиле тухуз кIубан я
Шарвилидин весияр!