Ашкъи себеб яз фида зун рагалай 78

Еб элит1на, гатаз Керим, са мал хьиз,
Галч1ур ийиз тухвана лап рагал хьиз

Акъвазарна, буйругъ гана:"Лякь ят1а,
Лув це цавай, ви муьгьуьбат гьакь ят1а".

Чара авач, вуч авурай етимди,
И чилерал садни туш мидаимди:

"Ашкъидин ц1ай рик1е аваз рагалай
Хкадарда, амукьуй и дагълара

Муьгьуьбат. Къуй к1анибурун рик1ера,
Илгьам хьурай, нур авахьиз вилерай.

Садни тахьуй зун хьтин мад фагъирар,
Тахьуй чпел гъибетчидин тахсирар.

Муьгьуьбатни туьгьметдилай вине хьуй,
Вичикайни халкьариз диб-бине хьуй.

Зи руьгьдава ашкъи гуьзел баяд яз,
Пуд къан беден ашкъидикай азад я.

Заз зи ярдин рик1икайни к1вал хьана,
Амма тандиз, мад вучин, ажал хьана.

Ажалди зи чан къачурай тахсир квай,
Аллагьд рекье михьивилик хийир ква.

Сагърай Назлу!"- лагьана са гьарайна,
Лекьре хьтин, гъилер вичин ахъайна

Хкадарна рагарилай циферал.
ДАгълари сес тикрарна, пис эверай.

Назлудини тикрарна сес эверин,
Садлагьана туьхвена экв вилерин.

Татабар гуз къванерал ам алукьна,
Са кьадар вахтунда ик1а амукьна.

Хтай ч1авуз вич-вичелди кт1унна
Ц1илинивди, хуьр галайвал ч1угунна.

Жегьил руш, са есир хьтин, галтад жез
Акур ч1авуз, садбур авай мидад жез.

Садбуруни хъиляй ийиз туьгьметар,
Арадал гъиз несигьатар, адетар.

Фикирд кьуна авай, кьвези Селима,
Паб зунжурун буйругъ гана Келимаз.

Беябурди кьунвай рехи чуруяр
Михьи хъжеч, гайит1ани суьруьяр.

Алахъна ам вич итим тирд къалуриз,
Рушан намус, рушан т1варни кьац1уриз.

Тваз вугана тевледа руш, сура хьиз-
Гуьзел тават ава бахтикъара хьиз.

Зунжурдава тевледа ам есир хьиз,
Недай, хъвадай зат1ни тагуз фагъирдиз.

Са вад къалай нефес къвазна Назлудин,
На лугьуди, ам кьиникьал бахтлу тир.

Назик, ширин хъвер аламай п1узаррал;
Пара вахт тир хъвер тавуна, хабаррай.

Кучудна руш, мадни йикъар алатна,
Кериман дуст гьик1 ят1ани акъатна.

Кар хьайивал чирна ада хъсандиз,
Тахсиркаррин фена амай дувандиз.

Мад рахана, гъил эцигна гапурдал,
Лап са зурба сес акъатна, зурзурдай,

- Гел тахьурай мад и хуьре ашукьдин,
Зи хци тур адан кьамухъ галукьда.