Ви дерди-гъам зи рик1из гъам-хифет я. 77

Гьикьван эхда кьуьзуь касди хъуьруьнар,
Хабарни туш Керимаз, лап гатунар

Авурт1ани къарху авач- ахмакь я,
Ахмакьвиляй гьар са ч1авуз ам гьакь я.

Хата тушир, жув хьтинди гъанайт1а,
Я тахьайт1а жувни жегьил хьанайт1а.

Чир хьана кьвезидаз вичин усалвал,
Рик1елайни алатнавай кьегьалвал.

Эвер гана вичин кьилив Селима,
Керим рекьин патал, стха Келимаз.

Чир хьана Назлудиз и кар, эх хьанач,
Кьефесдавай нуьк1рекай са лекь хьана.

Вич себеб яз к1еве гьатай гададиз,
Куьмек авун минетарна Худадиз.

Ахпа йифиз чинеба ам эвич1на
К1аник фена, фад куьчедиз экъуьч1на.

Рик1е-рик1 нез физва Назлу зирекдиз,
Аял хьтин фагъирдин ам куьмекдиз.

Ярх хьанава чилел Керим, кьейид хьиз,
Дуьньядикай вил ат1ана фейид хьиз.

"Къарагъ Керим, яб це на зи гафариз,
Зун чинеба атанва ваз хабариз.

Чанта къачу, ката вини дагълариз
Таквадайвал, жезамай кьван яргъариз.

Пара хьанва вавай, Керим, гъалат1ар,
Къе йифиз ви кьилив къвезва жаллат1ар".

Зайиф хьтин сес акъатна, гададин:
"Кьиникь вуч я, ам гъилева Худадин.

Суравайдаз кьиникьикай хабар туш,
Суравайдал гъил атунни гьунар туш".

Шехьзава руш, вилелай къвез алахьиз,
Кьвецинни накъвар чилелла, акахьиз.

Минетзава, язух къвезва Назлудиз,
Вич-вичикай квахьна, вигьиз далудиз:

"Ашкъиди зун канва, зи чан гьелек я,
Ч1улав хьайи зи уьмуьр низ герек я.

Мад за уьмуьр и етимдин тергзава,
И карди зи рик1из агъур дертзава".

Ишез к1евиз, аял хьтин чилеллай,
Кериман кьил Назлугуьлан мет1елла.

Гьайиф ч1угваз шехьзава руш, пис хьана,
Килигзава фагъирдиз, эгис хьана.

Фикирзава; зидни бегьем чан хьанач,
Патав гва зун са кьвезидан, къван хьана.

Гьайиф ч1угваз, эхир руша регъуьдиз
Ик1лугьузва:"Яб це жуван Назлудиз.

Зи язух шей, чан гада ваз минет я,
Ви дерди-гъам зи рик1из гъам-хифет я

Зун хутах на инай маса уьлкведиз,
Аквар гьалда, чун кьулава нянедин".

И ван хьайи Керимак лув акатна,
Дерди гъамар рик1яй михьиз акъатна.

Шалта-шулта к1ват1из абур эгеч1на,
Тадидаказ кьведни рекьиз экъеч1на.

Са кьадарниз акъатайла жегьилар,
Ахгалкьзава, галтугзавай векилар.